Willemstad— Un eks Fiskal Ousiliar ku a laborá pa basta aña na e departamentu di tráfiko a trese su eksperensia padilanti  unda e ta haña ku sigur Ministerio Públiko ta midi ku dos midi ora ta trata di sierto  persona .

Ta trata di un eks agente polisial ku a laborá pa 39 aña i mei den Kuerpo Polisial di kual mayoria di e aña nan ei e la laborá na e departamentu di tráfiko esta di ta un eksperto riba e tereno di tráfiko. Ta trata di un agente polisial sumamente serio den su trabou komo polis di tráfiko di kual mayoria hende i òf polis ku a atendé kuné tabatin rèspèt pa e i dimes su trabou. E agente polisial aki ku a traha 39 aña i mei na e departamentu di tráfiko a kuminsá for di un agente te ku e la baha ku penshon na e departamentu enkestion. Na e departamentu di tráfiko e la laborá komo hefe i tambe investigadó di aksidentenan i tambe e ta un profeshonal esta un eksperto  den su trabou. E agente polisial aki tambe tabata un Fiskal Ousiliar i a atendé mas ku 5 mil i piku aksidente durante su trayektoria. E eks eksperto di tráfiko pa medio di un voice  a reakshoná den direkshon di e aksidente ku a tuma lugá último den kual dos persona a bin pèrdè nan bida.  Segun e eks hefe di e departamentu di tráfiko ora ku ta sierto hendenan den nos komunidat semper e aktitut di ministerio públiko ta kambia kual ta loke e mes a eksperensia. Segun e eks hefe e patronchi aki e la mir’é i bibe durante di su trayektoria largu na e departamentu di tráfiko.   Ku esaki e kier a splika ku ta sosodé dos kaso meskos i ora ta  trata di ékis persona ta usa sierto manera pa atendé kuné i na momento ku tin ku trata ku Ulandes, Ministerio Públiko ta kambia kompletamente den nan manera di mira kos. Segun e eks Fiskal e ta bai ilustrá algun ehemplo pa asina kada ken por saka nan konklushon. Ta trata di kasonan ku a pasa di kual e mes tabata verbalisante den esakinan.

Bullenbaai

Un di ehèmpelnan ta ku mas òf ménos 2 aña pasa nan komo polis tabata teniendo un kontròl di tráfiko pa kontrolá uso di alkohòl. Ta trata di un kontròl ku a tuma lugá riba e kaminda pa bai Bullenbaai. Durante di e kontròl aki tabata kontrolá e promilage 350 ugel esta ku un persona no por surpasá e kantidat di promilage den su sistema ora e ta manehá un vehíkulo. . Na dado momento a pasa dos vehíkulo tras di otro. A logra di para ámbos vehíkulo i a bai kontrolá e shofùrnan. Un di nan a supla 1110 ugel miéntras e otro a supla  1120 ugel. Esta ku niun di dos shofùr no por a para sikiera riba nan pia debí ku nan a pasa kasi res biaha e porsentahe di alkohòl. Mester a tende ámbos shofùr sino tur dos a kai. Durante di e kontròl aki tabata presente un Fiskal di Ministerio Públiko. E Fiskal di Ministerio Públiko aki a drenta den e vehíkulo ku tabata wòrdu manehá  pa un Ulandes Oropeo i a laga e Ulandes Oropeo aki ku sigur tabata mal fuma sinta den su banda i a hala e outo pone kantu di kaminda.  E fiskal na su turno a bisa e ulandes fuma pa drumi sosegá su kurpa un ratu i ora ku e lanta bek e lo kontrole pa wak si e por manehá e vehíkulo i den kaso ku e no por lo e lag’é bèl un hende pa bin kore su vehíkulo pe. E fiskal despues ta baha for di e outo di e Ulandes i ta kana bin serka e agente polisial ku ta trata na e departamentu di tráfiko i ta bisé pa detené e yu di Kòrsou si pa transporte pa warda pa asina e keda presentá dilanti un Fiskal Ousiliar. Esta den e kaso aki di e Ulandes si e Fiskal Makamba mes a drenta den e outo di e ulandes pone na kantu pa e por sosegá su kurpa miéntras e yu di Kòrsou si mester a wòrdu detené.

Seri Loraweg

Un otro  senario tabata riba Seru di  Loraweg na altura di e edifisio unda ántes e ofisina di reibeweis tabata ubika. Einan un outo tabata bayendo direkshon e kaminda di Sta Rosa miéntras un otro tabata bini for di e direkshon kontrali. E vehíkulo ku tabata bayendo den direkshon di e kaminda di Sta Rosa un vehíkulo for di e direkshon kontrali ta bin riba dje pone ku e mester a baha reks for di kaminda. Einan a surgi un aksidente frontal pone ku e shofùr ku a trata pa evitá e aksidentá i a baha  na su man drechi for di riba kaminda a bin fayesé na e sitio mes debí na e leshonnan ku e la sufri dor di e choke frontal.  Esun ku a bai kore na man robes i a okashoná e aksidente fatal tabata un Ulandes.  Na dado momento Fiskal di Ministerio Públiko a bisa na bos haltu ku e no ta pèrsigui e shofùr ku a okashoná e aksidente fatal. E shofùr ku a okashoná e aksidente tabata hopi fuma mes.   E úniko palabra ku e Fiskal a usa e tempu ei ta ku lo mi no persiguié. Segun e eks Fiskal Ousiliar aki  e no kier bai lanta niun diskushon ku si ta trata di makamba si òf no pero si e kier trese e otro banda di medaya pa para ketu ku sorto di kasonan ku tin sierto gremio ta wòrdu privilegiá ta sosodé i ta lanta interogatorio. Segun e eks polis di tráfiko aki ku e tin masha hopi kaso  ku e por trese padilanti pa mustra ku ora bèrdat ku  na momento di sierto gremio Ministerio Públiko su manera di wak e kasonan ta kambia. Segun e eks polis e no kier bai den detaye di e kaso lamentabel último pero si e kier a bisa un biaha mas ku  Ministerio Públiko ta wak e kasonan otro ora ku ta trata di sierto figuranan.