Back to Top
Vigilante banner image

Un bista kronológiko di loke a pasa den 1 aña di tempu den futbòl di Kòrsou


December 31, 2024 • 7 minüt pa lesa

Jong Colombia

WILLEMSTAD—Komo ku awe ta 31 desèmber, kual ta nifiká último dia di aña 2024 nos ta bai duna un bista di loke a pasa den futbòl di Kòrsou. Nos ta kuminsá for di 1 di novèmber 2023 pa awe 31 di desèmber. Nos ta hasi esaki pa bo por saka bo konklushon unda nos ta para ku futbòl di Kòrsou drentando aña 2025.

1 di novèmber 2023

E fecha aki ta históriko. Normalmente FIFA  no ta gusta pa atendé disputanan den korte. Na diferente okashon e ekipo di Hubentut Fortuna a pidi direktiva di FFK pa nan por haña arbitrahe. Semper ku nan a pidi arbitrahe nan petishon a keda ignorá. Esaki a pone ku dia 1 di novèmber di 2023 nan a entamá kaso kontra FFK. Tabata un moveshon ku direktiva dfi FFK no a spera i ku Ramiro Griffith mester a akudí na korte pa splika di nan banda.

Ramiro Griffith: E la a sinta 20 di aprel di 2022 i baha 15 di ougùstùs di 2024. Den algu mas ku 2 aña ku e la sin ta komo presidente di FFK e la a pèrkurá pa futbòl ta kaminda ku e ta aki na Kòrsou.

15 di novèmber 2023

E fecha aki tambe ta kombertí su mes den un akto históriko. Tabata e dia ku wes a reserva pa a dikta sentensia den e kaso ku Hubentut Fortuna a entamá kontra FFK. E veredikto di korte a kai na fabor di Hubentut Fortuna.   Korte a hasta mara e sentensia na un dwangsom di te na un máksimo di 25 mil florin si FFK no a kumpli ku e veredikto. E sentensia aki a pone ku FIFA a manda un karta rabia indikando ku disputanan no por tuma lugá den korte i ku mester kana e kanalnan atraves di FFK. E karta aki a pone ku FFK a duna Hubentut Fortuna arbitrahe.

28 di desèmber 2023

Riba e fecha aki mayoria dje ekiponan ku ta afiliá na FFK a disidi na yama un reunion general èkstra ordinario. Den e reunion aki e dirigentenan di futbòl a proponé pa vota i hinka Jean Fransisca, Erik Fraay i Stanley Coffy den e direktiva pa asina remplasá e 3 dirigentenan ku a bula afó. E dirigentenan a vota i nan 3 a keda hinka den e direktiva presidí pa Ramiro Griffith. FIFA a manda karta bisando ku e no ta rekonosé e elekshon. Ta asina ku FIFA a indiká ku no por bini niun tipo di elekshon, miéntras no hasi kambio den statüt.

16 di yanüari 2024

E dia ku a bira konosí kiko tabata e desishon dje Komishon di Arbitrahe ku tabata konsisti di mr Peterson, mr Morillo i mr Koffy. Nan 3 a dikta ku Hubentut Fortuna a gana nan kaso, kua a nifiká ku mester a hunga e final di segundo divishon di aña 2021/22 di nobo. Ta un senario ku abogado di FFK Berti Braam a teme ya ku e la bosifera esaki durante tratamentu dje kaso di parti Komishon di arbitrahe. Komishon di Arbitrahe no a tene kuenta ku e preokupashon di mr Berti Braam i disidí ku e final mester hunga di nobo.

Subt

24 di febrüari 2024

Despues ku a bira konosí ku FFK mester organisá e final di nobo e ekiponan afiliá na FFK a disidí na tuma posishon. Nan tabata kier pa FFK respeta e desishon di Hubentut Fortuna. Riba e fecha aki un akto históriko a tuma lugá den futbòl di Kòrsou. E ekipo di Jong Holland tabata e promé  ku a tuma e posishon di no hunga i esaki a sigui ku otro ekiponan ku a hasi meskos.  

26 di febrüari 2024

Na momentu ku FFK a tuma nota ku dia 25 di  febrüari tantu SUBT komo Centro Barber no a presentá pa nan respektivo enkuentronan nan a disidí pa tuma un desishon na nòmber di direktiva. E desishon tabata ku ta posponé e kampeonato ku 1 siman. E dia ei nan ta partisipá ku Komishon di Arbitrahe a duna su veredikto i ku nan lo deliberá ku Hubentut Fortuna pa determiná kon ta sigui.

10 di mei 2024

Dirigentenan di futbòl a disidí na tene un presentashon pa asina mustra dikon tin di pasa un moshon di deskonfiansa kontra Ramiro Griffith. Diferente dirigente a partisipá den e reunion aki i tabata bisto e dia aki ku e dianan di Ramiro Griffith komo presidente di FFK ta konta. E dirigentenan a tuma e posishon aki despues ku abogado mr Sulvaran a indiká na nan ku miéntras ku nan no ta kla pa yega na e stashon aki pa no bati mas na su porta.

Centro Dominguito:

30 di mei 2024

Riba e dia aki e dirigentenan di futbòl a pèrkurá pa un akto ku nunka a sosodé den e mas di 100 a؜ña di eksistensia di futbòl na Kòrsou. Manera ta konosí ta 4 body a dirigí futbòl aki na Kòrsou den e algu mas di 100 aña ku ta praktikando e deporte. E promé tabata CVB. Sigui pa FEDEPROF for di dékada 70. Último 38 añanan pa FFK. Nunka promé niun presidente a pasa door di un moshon di deskonfiansa. Dia 30 di mei Ramiro Griffith a kombertí su mes den e promé presidente ku dirigentenan di futbòl a disidí na manda un moshon di deskonfiansa den su kontra.

31 di mei 2024

Manera trese pa dilanti ta asina ku 30 di mei di 2024 e dirigentenan a pasa un moshon di deskonfiansa kontra Ramiro Griffith. Riba e dia aki a sosodé 2 akto ku a hala atenshon. Unu di nan t’e echo ku e dirigentenan di futbòl a informá FIFA dje desishon ku nan a tuma un dia promé.  E otro akto tabata ku Ramiro Griffith no a sinta ketu i partisipá ku e lo keda sinta komo presidente te dia ku elegi un presidente nobo.  Di e forma aki Ramiro Griffith kier a mustra e dirigentenan di futbòl ku e moshon di deskonfiansa ku nan a pasa kontra dje no ta konta.

9 di yüni 2024

Esaki tambe a bira un dia históriko. Manera ta konosí FIFA a duna di konosé ku no por bin niun klase di elekshon, miéntras ku statüt no ta kla. Riba e fecha aki Ramiro Griffith kompaña pa Sharetti Bryant ta informá komunidat di futbòl ku nan a kaba di risibí e statüt nobo despues di sali kantor di notario Melissa Esther Samandar.

25 di yüli 2024

Undeba

Despues ku tabatin ku statüt a keda kla 9 di yüni a habri e posibilidat pa esnan ku kier a postulá nan mes pa drenta direktiva di FFK. Tabatin 7 kandidato ku a postulá nan mes pa drenta direktiva di FFK. Nan ta Gilbert Martina, Fabi Constancia, Gijs Gijsbertha, Wilfrido Isabella, Ramfis Donker, Hubert Isenia i Russel Smith. Dje 7 kandidatonan aki 6 no a pasa e screening di Benno van Leeuwen. Esaki a pone ku nan a bai Komishon  di Apelashon ku a disidí nèt kontrali dje desishon di Benno van Leeuwen. FIFA no a konfia e asuntu i riba e dia aki nan a manda un karta pa bisa ku elekshon no ta sigui mas.

27 di yüli 2024

Riba e fecha aki e siguiente kandidato a kere ku nan lo a drenta den e direktiva nobo di FFK.  Gilbert Martina, Fabi Constancia, Gijs Gijsbertha, Wilfrido Isabella, Ramfis Donker, Hubert Isenia i Russel Smith a keda warda riba un anunsio nobo di parti FIFA pa sa ki dia ta bin ku elekshon.

15 di ougùstùs 2024

Apesar ku Ramiro Griffith a duna di konosé ku e lo tei te na momentu ku tin elekshon, e ta sorprendé mundu di futbòl anunsiando ku e dia aki lo ta e último dia ku e ta fungi komo presidente dio di FFK. Promé ku e la a baha e la saka un video den kua e ta mustra tur e loke nan ku e la logra pa futbòl. Entre otro den e video e la bisa ku 20 di aprel 2022e la heredá FFK ku miónes na debe i ku e la pèrkurá pa hasi esaki masha chikí mes.

5 di sèptèmber 2024

Na momentu ku Ramiro Griffith a baha komo presidente di FFK e ofisina a keda atendé pa Irving Faneyte i Hubert Isenia komo e 2 únikonan ku a sobra dje direktiva. Nan 2 a keda manehá e ofisina te na momentu ku FIFA a instalá un Komishon di normalisashon. E komishon aki konsistiendo di Reggie Carolina, Jairo Belioso i Sueena Fransisco a sinta riba e dia aki i bisa ku nan a haña enkargo di FIFA pa presentá un roadmap pa dia 30 di sèptèmber.

Komishon di Normalisashon: E speransa tabata ku nan lo a maske anunsiá ki dia elekshon ta sigui i ki dia bala ta kuminsá lora atrobe. Te awe despues di 4 luna sinta, niun dje 2 anunsionan aki.

29 di sèptèmber 2024

Riba e dia aki a bira konosí ku e eks direktor di Aqualectra Darick Jonis a bira e SG nobo di futbòl di Kòrsou. For di yüli 2024 e kontrakt di Kimberly Gario a terminá komo SG di FFK i riba e fecha aki a keda anunsiá ku Darrick Jonis ta asumí e posishon.  Na momentu ku e la sinta, e la indiká ku e roadmap ta kla for di 15 di sèptèmber, pero ku e tabatin ku internalisá esaki.

Darick JonisKomo SG e la bin ta traha duru, pero ta komosifuera ku e tampoko no ta logrando.

30 di sèptèmber  2024

Esaki tabata un fecha antisipá pa dirigentenan di futbòl ya ku e dia aki Komishon di Normalisashon a yama un reunion ku nan. Kontra di tur espektativa e reunion aki a keda posponé. Den mesun rosea Komishon di Normalisashon  a anunsiá ku no tin plaka pa organisá futbòl ya ku FFK ta yen di debe.

29 di òktober 2024

Riba e dia aki Komishon di Normalisashon ta reuní ku e dirigentenan pa promé biaha. E dia aki e Komishon di Normalisashon a hasi un partisipashon ku a shòk tur esnan ku tabata presente ku e direktiva presidí pa Ramiro Griffith a krea un debe di 780 mil florin. Den e mesun reunion aki nan a trese pa dilanti e proposishon pa organisá un torneo, pero sala a rechasá esaki indikando ku ta kampeonato ofisial nan kier. E echo ku sala no a bai di akuerdo a pone ku nan a primintí na bini bek den un otro reunion.

28 di desèmber 2024

Despues di 1 luna dje promé reunion e dirigentenan di futbòl no a tende nada mas di parti Komishon di Normalisashon. Esaki a pone ku dia 28 di desèmber nan a dirigí un karta na Komishon di Normalisashon ku e petishon pa yama un reunion general pa mas tarda 15 di yanüari 2025. E 3 puntonan ku nan kier pa trata den e reunion aki ta ku nan kier sa kiko t’e status finansiero di FFK. Nan kier sa ki dia ta yama elekshon pa skohe un direktiva nobo di FFK. Tambe nan kier sa ki dia bala ta kuminsá lora atrobe na Kòrsou.

Fanatikonan: Tur dia nan ta puntra ki dia bala ta kuminsá lora atrobe. Úniko konsuelo ku nos por duna nan ta publikando foto dje ekiponan di futbòl.

 31 desèmber 2024

Aña a sera sin ku bala a lora nunka mas. Kuminsando for di 26 di febrüari ku FFK a hasi su anunsio di ku pa 1 siman lo posponé e kampeonato di promé divishon, di 2 divishon i di 3 divishon ta hasi ku ofisialmente pa awe 31 desèmber ta nifiká ku 308 dia a pasa sin nada sosodé. Un anunsio di posponementu pa un siman a bira entre tantu 308 sin konta esnan ku tin di bin aserka den 2025.

Jong Holland
Skerpene
Victory Boys
Login