Sospechoso ku ayera a keda presentá dilanti wes komisario a splika ku e la hañ’é ta tira debí ku kier a batié.

Willemstad— Ayera tabata e dia ku e sospechoso M.M.M. di 36 aña  a keda presentá dilanti wes komisario unda a evaluá su detenshon i a larga esaki ku ocho dia mas pendiente e investigashonnan ku mester tuma lugá ainda.

Manera ya ta konosí tabata djadumingu 7 di mart 2021 alrededor di 08.20’or, Sentral di Polis a risibí informashon di un pleitamentu serio ku tabata tumando lugá na un adrès na Juan Domingo bij Mahuma. Mesora a dirigí un unidat na e sitio.  Djis un ratu despues a drenta otro informashon ku na e mesun adrès aki abitantenan a tende vários tiru, pa despues tuma nota di un hòmber ku a bin kai abou heridá den kura di e kas.  Na yegada di e unidat nan a bin topa en bèrdat un hòmber drumi den e kurá ku vários herida di bala na su kurpa.  Mesora a pidi presensia di ambulans, ku na nan yegada no por a hasi nada mas pa e víktima.

Ta trata di e hòmber Almier Godett, nase na Kòrsou dia 26 di sèptèmber 1982. Kontinuando ku e investigashon, polis a bai na un adrès den Mahuma Kaya O, na unda a bin topa diferente kashi di bala ku a keda konfiská. Na e mesun sitio ei, a detené alrededor di 09.00’or e hòmber sospechoso M.M.M. di 36 aña di edat nase na Kòrsou, pa e kaso di asesinato ariba menshoná.

Alrededor di 10.30’or, polis a detené na e promé sitio di insidente, esta Juan Domingo bij Mahuma, e hòmber sospechoso S.S.G. di 33 aña di edat nase na Kòrsou, pa destrukshon. Ayera e sospechoso M. ku a keda detené pa e kaso di asesinato a keda presentá dilanti wes komisario.

Segun e sospechoso e no tabatin problema ku niun hende na e kas esta na e sitio unda e problema a tuma lugá. Tabata un amigu di dje ku a yam’é pa bin intermediá den un problema ku ya tabatin algun dia andando i asta e dia anterior un famia di e víktima mester a agredí e amigu di dje. Debí ku e amigu a keda maltratá e amigu a yam’é pa asina e por a trata di evitá mas problema e mainta ei. E amigu  mester ta biba ku tanta di e víktima den e kura unda e suseso lamentabel a tuma lugá. Segun e sospechoso e ruman di e víktima i òf ta primu mester a bati e amigu di dje malamente durante di un problema ku tabatin e dia anterior i e na su turno a bai na e sitio pa trata di yega na un solushon.

E la bai ku e arma di kandela den su poder ya pa asina e por a defendé su mes mirando ku ya a maltratá asta su amigu ku ta biba den e mesun kura i e mainta ei kos tabata mustra ku e situashon tabata bai sali for di man un biaha mas p’esei e amigu a yam’é. Segun e sospechoso tabata durante ku e ku su amigu tabata tratando na yega na un solushon di kual e víktima tambe tabata presente, kosnan a bin Sali for di man i sin pensa e la saka e arma di kandela di miedu i a los bala.

Segun e sospechoso tabata na momento ku e famia kier a agredié e la saka e arma i miéntras e la kuminsá kore e la keda los bala ku e konsekuensha ku ya ta konosí. Segun e sospechoso na niun momento e no tabata den niun problema ku e víktima pero si e famia esta e ruman i lo demas  ku a agredí e amigu di dje kier a agredí e tambe. Vigilante a keda pone na altura ku e dos kas i tambe vehíkulonan ku a keda pega na kandela, un di nan ta kas di e hòmber ku ta biba ku tanta di e víktima kual tabata den problema ku un familiar di e víktima ( a ser bisa ku ta un ruman di e víktima tabata den problema ku e hòmber ku ta biba ku su tanta) i e otro kas ta di un prima di e víktima pero ku nan a rabia i sende su kas na kandela debí ku e tabata tuma parti pa e kontra partido. Ayera Wes komisario a larga detenshon di e sospechoso ku ocho dia mas. E kaso ta den pleno investigashon ketu bai.