E sènsòr di huma lo pita na momentu ku tin demasiado huma den un kas, esaki na su turno lo duna e kandela su “zonido” di atvertensha.

Willemstad— Mirando ku nos a inisiá siman di Prevenshon kontra kandela dia 3 di Òktober, departamentu di prevenshon  a pone énfasis riba e kantidat di kandela nan ku a tuma lugá i kon por prevení esaki.  Nos na Kòrsou tin kustumber di selebrá esaki tur aña kuminsando for di djadumingu i termin’é  awe djasabra9 di Òktober. E lema e aña aki ta pa Rekonosé e Zonido pa Prevenshon di Kandela.

E aña aki Brantwer di Kòrsou a para ketu na e oumento di kaso di kandela. Por a konta fo’i 2017 pa 2019, ku tabatin un kantidat mas ku mil asistensia duná. Na 2021 por a tuma nota ku esaki a baha un tiki i tabatin 934 asistensia duna. Tambe tabatin un subida leve den e kantidat di edifisio i kas ku ta kima durante aña. For di rapòrt nan duná,  Brantwer di Kòrsou por a mira ku tin 517 asistensia duná for di yanüari pa sèptèmber 2021.

Brantwer di Kòrsou tambe sa tin kaso nan di kandela feros i durante e aña aki a duna asistensia na 7 kas ku a kima kompletu. Bo ta papia di kandela feros na momentu ku Brantwer di Kòrsou yega na e sitio i e a kandela a ekspandé  di tal manera ku e kandela a hasi kontakto ku bientu pafó i e lenga di e kandela ta sali pafó dje edifisio.

Mirando oumento nan di sifra durante e último 5 aña nan, Brantwer di Kòrsou a bin ku un kampaña ku yama Prevenshon, e mihó Opshon den diferente bario. Esaki ta pa konsientisá hende tokante un kandela. Komo ku na Hulanda kasnan, flèt òf otro bibienda familiar tin un sènsòr di huma, Brantwer di Kòrsou a adaptá un kampaña di National Fire Protection Association pa asina pone énfasis riba sènsòr di huma den tur kas.

Segun investigashon di Brantwer di Kòrsou por a mira ku tin 81% kas na Kòrsou ku no ta disponé di un aparato pa paga kandela i 83 % no tin un sènsòr di huma. Brantwer di Kòrsou a ofresé durante e siman di Prevenshon di kandela na komunidat e importansha dikon mester tin un detektor di huma na un kas.