WILLEMSTAD – Parlamentario Gilbert Doran durante e reunion públiko den Parlamento tokante ‘importansia di empansipashon pa nos pais’ a puntra Minister di Enseñansa, Siensia, Kultura i Deporte Sithree van Heydoorn splika kiko Parlamento por hasi. Riba esaki Van Heydoorn a mustra riba e poder parlamentario di vigilá i traha leinan adekuá, den e kaso akí pa pais por mantené nos herensia kultural mihó, basá riba Tratado(nan) internashonal ku Kòrsou lo mester (ko)ratifiká. Komo ehèmpel ela duna e Tratado Herensia Intangibel, i e Tratado Malta pa loke ta trata eskavashon.

Minister Van Heydoorn a añadí durante kontestamentu di preguntanan den promé tanda, ku tin e intenshon riba mesa pa dekretá 1 di yüli 2023 te 1 di yüli 2024 komo Aña konmemorativo di Emansipasshon, den kuadro di 160 aña Abolishon di Sklabitut, manera e diferente NGO-nan ku ta resortá bou di e Plataforma Sklabitut i Herensia di Sklabitut a proponé den diferente programa. “Gobiènu a plania un reunion di sinkronisashon pa huntu bini ku un kalendario pa e aña ei.”

Pa loke ta trata nos héreonan, tin informashon kla konsipiá pa krea materialnan di edukashon pa skolnan. Segun Minister Van Heydoorn ya a introdusí kahanan di tema (themakasten) ku tópiko ‘Héroenan’ den skolnan. A hasié kaba na un skol den e bario di Montaña. I pa loke ta trata honra nos héreo nashonal, ta sondia un sitio prominente den sentro di siudat pa pone un estatua di Tula. Ademas Plataforma Sklabitut i Herensia di Sklabitut a entregá un petishon pa dekretá Ser’i Neger komo sitio di memoria. “E proseso ta kanando. Ta spera di por haña aprobashon pa duna mas realse, pa duna rekonosementu na Tula komo héroe nashonal.”

Riba e pregunta di Doran si Parlamento por risibí fondo pa por hunga un ròl independiente den konsientisashon di komunidat tokante Emansipashon, Minister Van Heydoorn a referí na Minister di Finansa Javier Silvania, ku ta esun ku lo por duna informashon finansiero. Di tur manera segun Minister Van Heydoorn: “Tin sufisiente eksperto i idea pa ehekutá. Si e parti di finansa no ta yega, pasó di tur manera mester tene kuenta ku presupuesto, e ora ei esaki ta indikashon ku mester oumentá e presupuesto.”

Riba pregunta di Parlamentario Steven Martina di MAN, Minister Van Heydoorn a informá Parlamento ademas ku djabièrnè awó e Sekretario General di Ministerio di Asuntunan Interno di Hulanda i di Relashonnan di Reino (BZK) Maarten Schurink ta bin Kòrsou spesialmente pa elaborá riba e proseso di Restourashon, despues ku ya gobièrnu Hulandes a start ku e proseso di parti di ayabanda kuminsando ku e diskulpa di gabinete Rutte 4.