Van Huffelen lo ta na Kòrsou pa pidi despensa
November 26, 2022 • 2 minüt pa lesa
Willemstad,– E pidimentu di despensa ku gabinete Hulandes ta bai pidi den desèmber awor ta sosodé riba e mesun dia ku na Hulanda i aki e kolonianan di ántes tabatin tantu di haber ku e asuntu di katibu.
Segun e fuente minister Weerwind ta biaha pa Paramaribo, kapital di Sürnam. Sekretario di estado Van der Burg ta bai Aruba, Minister Van Gennip ta bai Bonaire, sekretario di estado Van Huffelen ta bin Kòrsou, sekretario di estado Van Rij su destino ta Sint Estatius, sekretario di estado Van Ooijen ta bai Saba i minister Kuipers lo ta na Sint Maarten.
E echo ku ta pidi despensa no ta nifiká ainda ku mesora lo bini yudansa finansiero
pa famianan di e katibunan ku a keda atras. E gabinete a anunsiá si ku lo bini 200 mion euro den un fondo, for di kual lo mester paga proyektonan pa engradese esakinan. Tambe lo lòs un 27 mion mas pa traha un museo tokante di katibu.
For di un investigashon di I&O Research riba òrdu di NOS ta mustra ku e kantidat di hende ku ta haña ku Hulanda mester pidi despensa pa e pasado di katibu, a krese pero ketu bai e grupo di hulandes nan ku ta kontra ta mas grandi.
Kuminsamentu di aña pasa 31 porshento tabata na e banda pa pidi despensa i 35 tabata kontra, entre tantu e porsentahe a bira 38 i 49 respektivamente. E motibu prinsipal di e kambio aki ta e autochtone Hulandes.
Serka e hendenan ku tin un pasado di imigrashon, e sosten a keda hopi grandi. Di e Sürnam nan i Antiano nan na Hulanda dos tersera parti ta di akuerdo. Hopi di esnan ku ta di akuerdo ta mira e kos komo un rekonosementu.
Hopi di e siudadanonan hulandes ku a hunga un ròl den e tempu di katibu entre tantu ya a pidi despensa. Tambe e presidente di Banko Sentral Klaas Knot, a hasi esaki den yüli e aña aki , durante di e selebrashon di rekonosementu di Keti Koti di tur aña kaminda ta rekonosé e abolishon di katibu.
E tempu ei ainda Gabinete no kier a rekonosé e asuntu di pidi despensa. Segun fuentenan yegá na e gabinete, e tempu ei nan bo a haña e timing bon, paso tabatin hopi mal kontentu riba asuntu di gas i e guera na Ukrania.
