Willemstad,   FLOW kontinuamente a bini ta reiterá su kompromiso pa mantené komunidat di Kòrsou konektá. Sinembargo, resientemente e kompania lider di telekomunikashon i entretenimentu di Kòrsou, ta eksperensiando dañonan ku ta ser kousá na e infrastruktura di telekomunikashon, kua ta kousa interupshonnan den servisio di su apresiado klientenan.

FLOW a tuma nota di un oumento alarmante den vandalismo den e último lunanan, di kua mayoria ta na parti ost di nos isla. E aktonan aki ta kousando un impakto negativo riba bidanan di siudadanonan i tambe kontinuidat di negoshi den nos komunidat.

Rauf Engels, direktor statutario pa FLOW Kòrsou a menshoná: “Kada un biaha ku kòrta nos wayanan e ta kousa ku parti di nos isla ta keda sin servisionan. E impakto riba bida di nos klientenan i tambe e gastunan ku Flow ta hañ’é konfrontá kune pa hasi reparashonnan i remplasá e daño na e infrastruktura di telekomunikashon dor di landronisia i vandalismo ta enorme. Esaki mester stòp”.

E kompania ta poniendo un sistema pa sigui fortalesé e protekshon di su infrastruktura, i ta trahando di aserka ku otro proveedornan i tambe kuerpo polisial  ̶  un kolaborashon ku ta yuda redusí e frekuensia i eskala di e aktonan aki dor di un koordinashon mas estrecho i mehorashon den asistensia i reakshon di agentenan polisial.

“Nos ta agradesido ku e sosten risibí serka nos outoridatnan lokal kende a bin ta asistí nos rápidamente na momento ku un situashon asinaki presentá. Tabatin momentonan ku ladronnan a ser gará den akshon i esaki ta manda un señal kla ku nos ta akifó i ta protehiendo nos ret pa nos klientenan, pa komunidat di Kòrsou,” Engels a añadí.

Vandalismo na infrastruktura di telekomunikashon den kualke pais ta impaktá hòspitalnan, poniendo e sistema di kuido di salú di e komunidat na peliger. Esnan responsabel mester ta konsiente di e konsekuensianan enorme ku por ta di bida òf morto ya ku konekshon ta parti integral den tur loke nos ta hasi.

FLOW lo sigui proveé komunidatnan ku e hèrmèntnan nesesario pa konektividat i oportunidatnan pa éksito sea ta na kas, skol, den sírkulo sosial, òf moviendo, ya ku e ta motivá pa su mishon di proveé akseso i empoderá komunidatnan kaminda e ta operashonal.