“Un felis djamars i un djamars bendishoná den kada kas aki na Kòrsou. Djadumingu tras di lomba tabata tin apertura di temporada di Seú 2025 i esaki a tuma lugá riba Gomezplein i aktividat a kuminsá 3 or di atardi i den kurpa di 8 or anochi esaki a keda na su parti final ku un bankete musikal di e hóben nan di Hóben na Timon ku a perkurá pa pone tremendo ambiente.”

“Aparte ku tabata tin apertura di temporada di Seú,tambe tabata tin inskripshon di “E Kantadó Mayó”,Reina di Seú i grupo nan di Seú tambe a inskribí djadumingu tras di lomba i tur esaki nan a bai den un forma eksitoso. Pa loke ta trata grupo nan di Seú te na e momentu nan aki tin 29 grupo ku a inskribí,ainda tin oportunidat pa grupo nan inskribí,paso esaki ta habri ainda.”

“Pa loke ta trata elekshon reina Seú esaki te ku djadumingu anochi tabata tin 7 dama ku a mustra nan interes i nan a inskribí nan partisipashon. Ta asina ku e elekshon ta tuma lugá aki dos siman riba e fecha di 12 di aprel binidero. Riba mes un anochi esta djadumingu último e 7 partisipante nan a presentá nan mes na e pueblo ku tabata presente na e sitio kaminda ku apertura di temporada di Seú a tuma lugá.”

   “Elekshon Reina Seú 2025 ku 7 partisipante ku a inskribí,Ku e temporada di Seú a yega e momento pa buska e embahador di fiesta di kosecha i kargadó di kultura pa aña 2025. Lo eligí un reina nobo di nos fiesta tradishonal di kosecha riba djasabra 12 di aprel 2025 durante un sertámen ku ta kuminsá 7’or di anochi na Plasa Museo Octagon den Penstraat. Durante e anochi kultural aki, shete kandidata lo kompetí pa e pèchi di Yaya.”

“E damanan lo mustra kiko nan tin aden ku nan presentashonnan i diskurso basá riba e lema: Kultivá patriotismo, pa nashon fortalesé. Kada kandidata den e periodo aki lo mara na e lema. E shete kandidatanan ta 1. Ishaina Girigorie Tópiko : Kariño spesial pa Pais 2. Rayzahna Martha Tópiko: Interes den bienestar di Pais 3. Jennifer Kirindongo Tópiko : Sakrifisio pa bienestar di Pais 4. Narián Martina Tópiko : Responsabilidat pa Pais 5. Ingemay Pieternella Tópiko : Orguyo nashonal pa Pais 6. Quishantely Mingel Tópiko: Konsenshi pa Pais 7. Sixiëly Martina Tópiko : Lealtat na Pais Lo bai tin músika, baile i presentashon di Kantadó Mayó.”

“Djis pa kòrda tur hende ku awe na un siman esta otro siman djamars ta e promé anochi pa loke ta trata festival “E kantadó Mayó”,kaminda ku tin 49 kantante i 13 agrupashon musikal ku ta bai partisipá durante tres anochi i djasabra 5 di aprel ta e anochi final. Tur kos ta mustra i indiká ku e dicho festival ta bai bira un festival eksitoso.”

“Ta asina ku Vigilante Kunukero a tuma nota ku tin dos grupo rítmiko popular ku e aña aki no ta formando parti di festival “E Kantadó Mayó” i dos agrupashon musikal nan ta Grupo Kompèr i Grupo Den Chikí. Si Vigilante Kunukero a keda pone na altura ku e dos formashon musikal nan menshoná huntu a forma un formashon musikal nobo ku nan ta bai partisipá kuné den e  dicho festival i nan ta bai ku tres kantante.”

“Inspirando Hóbennan Artístiko”,ta nòmber di e  agrupashon musikal nobo ku ta forma pa e dos grupo nan musikal ku ta Grupo Kompèr i Grupo Den Chikí. E tres kantante nan ku ta bai partisipá ku e grupo musikal nobo ta Reinier Lijfrock,Nerine Manuela i Sherendly Domacassé. No ta un sekreto ku den pasado e legendario kantante i alabes rei di ponementu di ambiente den e hanchi di Kultura ku ta Neny Domacassé a forma parti di Grupo Kompèr pa hopi aña.”

“E kantante  Thallysa “THALLY”Jano tambe pa promé bes ta bai partisipá den festival “E Kantadó Mayó” i e ta bai keda kompaña pa agrupashon musikal “Hóben na Timon” ku mester bisa nan tabata tin tremendo presentashon djadumingu tras di lomba. Pa mañan ku Dios ke Vigilante Kunukero ta trese mas informashon di diferente kantante i tambe agrupashon musikal nan ku ta bai partisipá den festival en kuestion.”

“Tin basta kara konosí,pero tambe tin basta kara nan nobo ku e aña aki ta bai partisipá den festival “E Kantadó Mayó”, ku no ta deskonosí ku e aña aki ta bai keda organisá pa un organisashon nobo,pero no un organisashon deskonosí den ámbito di farándula. Ya pa algun aña kaba e organisashon a organisá festival di tumba hubenil i nan a sa di hasi esaki ku éksito tambe. Bon awor si ku e informashon nan aki Vigilante Kunukero ta bai bandoná su boka di trabou,pero ta djis ta mañan pues den otro un palabra te mañan ku Dios ke.”