Villa Royal ta un dje promé kompanianan ku a trese un anunsio asinaki dilanti. Ta sospechá ku mas kompania tei anunsiá mesun kos ku Villa Royal.

Willemstad- Riba e ret sosial Villa Royal a publiká ku nan no ta di akuerdo pa pidi bishitantenan pa nan QR Code.

Esaki ta pa motibu ku Villa Royal ta un establesementu kaminda e eventonan ta tuma lugá den airu liber i nan no ta komprondé ku ta trata aki di salubridat òf pa wak ken sí ta obediente. Villa Royal ta sigui bisa riba nan Facebook ku nan lo no hasi deskriminashon den kolo, religion, status médiko ni nada otro.

Segun Villa Royal ta sigui splika den e post, nan tin 5 aña kaba ta warda riba un pèrmit di Gobièrnu, miéntras ku nan ta kumpliendo ku tur regla. Pues nan a disidí di ranka sali den un esfera privá. Esaki ta nifiká ku e lokalidat ta wòrdu di hür pa tur evento privá pero fiestanan públiko lo no por tuma lugá te na momentu ku nan por risibí tur hende.

Na Hulanda tambe ainda tin diskushonnan fuerte tokante di e asuntu di QR Code. Espesialmente e área di Horeca a trata na bòikotiá e QR code aki.  Esaki ta pa motibu ku segun nan, e QR code ta trese diskriminashon i ademas libertat di un persona no bakuná ta ser limitá.