Back to Top
Responsive image
E korant di pueblo

Vurnon Anita ta nifiká eksperensha, pulmon i futbòl di nivel pa “Pantera Negra”


March 5, 2021 • 3 minüt pa lesa

Vurnon San Benito Anita a nase dia 04 di April 1989 riba suela di Kòrsou. Kier men su lombrishi ta dera aki. Vurnon ta un bolante defensivo ku un karera impreshonante den ekiponan grandi manera Ajax, Newcastle United i Leeds United. Ke men esaki ta un hungado ku hopi eksperensia den tantu Eredivisie komo Liga Premier Ingles.

Na e momentu aki Vurnon ta milita den Eredivisie ku RKC di Waalwijk, kaminda e ta hasi un gran trabow komo bolante kontrolado, yudando su ekipo mantene su mes den divishon maksimo ulandes. Vurnon ta un eks internashonal ulandes, kende a  milita na tres okashon na aña 2010 den ‘oranje’. Anita tabata tantu den e pre selekshon ulandes pa bai mundial di Afrika 2010 komo kampionato Europeo di 2012, pero a kai afo na lastu momentu. Vurnon ku ta dos be kampion ulandes ku Ajax (2010/2011 i 2011/2012) den su tempu di gloria tabata bal mas ku 8 mion euro na 2012. E ta pertenese na e grupo di 100 di Ajax, esta hungadónan ku a milita 100 wega of mas  den e prome ekipo di e kapital di Hulanda. Finalmente e la yega e kantidat di 152 wega ku Ajax. Aktualmente e tin mas ku 200 wega hunga den Eredivisie ku Ajax, Willem II i RKC. Vurnon no ta kualke futbòlista i tin mas ku 100 wega den Liga Premier Ingles tambe den su pianan.  Vurnon su veterania i seriedat sigur lo yuda nos selekshon.

Vurnon ta kore hopi, kubri hopi kilometer pa wega i tin un bon pase den su pia. Su posishon faborito ta bolante kontrolado mei mei di tereno, kaminda e por intersepta hopi hungada. Ku Vurnon den selekshon e rumannan Bacuna por haña espasio pa hunga mas ofensivo, lokual indudablemente lo duna nos un di e lineanan medio mas poderoso den region di CONCACAF. Vurnon a forma parti di delaster un selekshon ulandes for di U-15 te ku selekshon grandi. Anita ku ta un ‘rapper’ tambe, ta lokual nan ta yama un ‘team player’ ku ta hasi hopi sakrifisio riba tereno di wega, pa otronan por funshona mas miho. Ku su veterania e por bira un lider i konsehero tambe pa e hungadonan mas hoben den selekshon. Anita a kuminsa su karera di futbol den CVV Willmestad, prome ku e la move na aña 1997 ku su famia pa Hulanda. Ela debuta ku apenas 16 aña den e prome ekipo di Ajax. E bolante di naturalesa, por hunga komo defensor lateral na tur dos banda di tereno tambe si tin mester. Esei ke men ku e ta un hungado multi funshonal. Esaki si ta un grandi pa nos, manera na ta bisa un ‘big fish’ di bèrdat.  E kos di mas bunita ta, ku Vurnon tin hopi tempu ta pronunsia su deseo i anhela pa por hunga bala pa su isla natal.

Porfin e soño ei a wordu kristalisa. No por tin niun duda, ku pa nos tambe Vurnon lo hunga ku entrega total manera e la bin ta hasi hinter su karera. Ku disiplina i spiritu di lucha. Pase pa gol tambe ta un di su spesialidatnan, hinka bala den buraku manera nos ta  bisa den termino futbolistiko. Ku Vurnon hasta nos por opta pa hunga ku un bolante di tres. Vurnon mei mei i e dos junan di John Bacuna mas ofensivo den un triangulo ku punta patras. Vurnon komo ‘stofzuiger’ dilanti di e dos defensanan sentral pa kibra hungada di e kontrinkante, paso esei ta su kos. Ku Anita e selekshon ta gana na eksperensia, ku sigur nos lo tin mester si nos pasa e prome ronda i bai topa eks mundialistanan, kuminsando ku e ‘canaleros’ di Panama. Vurnon su eksperensia amplio den weganan grandi dilanti hopi publiko lo bin nos di bon.

Vurnon, Kòrsou kompletu ta yamabu bon bini den ‘Pantera Negra’ i nos ta spera mas hungado di taya pa nos por krea nos monster den CONCACAF rumbo pa e baki santu ku yama Qatar 2022. BON BINI RUMAN!!!   

Login