Pik Pisas

Punda— E region di Westpunt te ku St. Michiel ta konta ku un kantidat di 15 urna (separando un urna den St. Michiel) i na 2017 a akumulá 17.123 voto . Sifras na e urnanan den e region a konkluí algun datos interesante. Lokual mas a sobresalí ta e total di voto ku e 11 lidernan di partido a haña, na 2017 no a surpasá 47% di e total votadónan aktual den e region.

Sin a pasa den kada urna pa kalkulá e no partisipashon, abase di e 67% di partisipashon na 2017, un kantidat di 11.472 persona a vota den e region di Westpunt te ku St. Michiel. E 11 lidernan di partido a logra haña 47% ku ta 5.424 voto. E resultado aki no ta kuadra si analisá e listanan i totalisá e votonan lográ pa e lidernan di partido, kual mayoria ta riba 50% dje total di lista i tin hasta lider ku a surpasá 70%. Un otro faktor pa analisá ta e hecho ku 3 kandidato, kendenan no tabata lider di partido a logra haña kasi 50% di e votonan ku 11 lider a haña. Ta regardá e kandidatonan, Gilmar “Pik” Pisas, Steven Martina i Rutmilda Larmonie, kendenan den e region na 2017 a logra un total di 2.502 voto entre nan tres. Un desaroyo pa tene kuenta kuné pasobra tur e 3 kandidatonan ta presentá e biaha aki komo lider di partido. Pa mesun motibu tambe, presensha di e tres polítikonan aki komo lider di partido ta bai hasi e region unu interesante.

 Na 2017, komo lider di partido Eugene Rhuggenaath di PAR a sali fo’i e region te ku Jandoret ku mas tantu voto. Den e 15 urnanan e la logra haña un kantidat di 1204 voto sobresaliendo ku 183 voto na Sentro di Bario San Wilibrordus, unda den bario di Rif St. Marie i besindario tin hopi hulandes oropeo ta biba. Despues komo lider di partido na 2017 a sigui Hensley Koeiman ku 1169 voto, kende pa siguiente elekshon no tin e posishon di lider. Despues di Koeiman a sigui Gerrit Schotte (MFK) 1062, Amparo Dos Santos (KDNT) 716, Marylin Moses (MP) 352, Suzy Romer (PIN) 296, Omayra Leeflang (HUSTU) 180, Haime Cordoba (PS) 149, Rene Rosalia (MKP) 120, Humphrey Davelaar (PNP) 120 i finalmente Amado Rojer (FOL) 15.

Aparte di e lidernan di partido ta interesante pa analisá komportashon di voto na 2017 riba 3 kandidato partikular, pasobra ta 3 kandidato kendenan ta bai elekshon e biaha aki komo lider di partido, miéntras na 2017 esei no tabata e kaso. Gilmar Pik Pisas, ta e persona kende personalmente a logra kue mas tantu voto den e region korespondiente na 2017.  No tin niun otro polítiko na Kòrsou kende a logra mas voto di Wespunt te parti di St. Michielsweg. Pa e region menshoná Pisas a logra haña 1479 voto. E kantidat ta mas tantu voto ku tur lider di partido na 2017. Pisas na 2017 tabata number 4 riba lista di MFK i logra gana hasta su lider, Gerrit Schotte na Banda Abou.  Na Kolegio Don Sarto na Soto, Pisas a logra haña 83% di esnan kende a bai vota na e urna.

Ta sigui Steven Martina. Martina tambe ta a bai elekshon na 2017 komo kandidato pa MAN pero na siguiente elekshon lo ta lider di partido meskos ku Pik Pisas. Pero Martina su prestashon ta kontrali. Na 2017, MAN tabatin Hensley Koeiman komo lider i e la logra haña 1.169 voto pa e region. Esaki ta e di tres kandidato ku mas tantu voto, despues di Pisas i Rhuggenaath. Martina komo number 2 riba lista di MAN na 2017 a logra mas tantu voto ku Koeiman total, pero den e region di Banda Abou Hensley Koeiman a haña mas tantu voto. Esaki por ta un motibu ku MAN mester ta un tiki prekupá ku e region pasobra Steven Martina a logra 821 voto, kual ta mas abou ku Koeiman, pero den tur sobrá region Martina a surpasá Koeiman durante elekshon di 2017.

Finalmente un otro polítiko, kende na 2017 tabata kandidato i na 2021  lo paresé komo lider di partido ta Rutmilda Larmonie Cicilia. Na 2017 e la paresé riba lista di Pueblo Soberano i meskos ta e kaso ku Steven Martina a logra mas tantu voto ku su lider. Larmonie, den un kambio ta un faktor nobo komo lider di partido pa Nashonal di Pueblo. Ku 202 voto den e region na 2017 riba lista di Pueblo Soberano e tabatin mas voto den e region ku su lider. Manera menshoná na 2021 Larmonie lo ta lider pa Partido Nashonal di Pueblo, pero lo mester prueba su mes den un region kompetitivo ku manera kosnan ta indikando lo por tin alrededor di riba 11 mil votadó kual por ta 2 asiento reglamentario i kisas 1 suplente.

Mester tene kuenta tambe ku aparishon di oponentenan nobo manera Lo Martinez di KEM. E region ta karga teorétikamente entre 2 pa 3 asiento totalisando un kantidat di votadó kolektivo di kasi 18 mil voto (sin non voters). Na 2017, MFK i MAN a bringa duru ku e blankunan di MFK akaparando 19% di e votadónan miéntras blounan di MAN a logra 15%. PAR komo e partido mas grandi na 2017 no a pasa 9%.  Pa mart 2021, e arena lo ta diferente.