Willemstad,– Redakshon di Vigilante a tuma nota di diferente notisia falsu ta bai rònt riba retnan sosial manera Facebook i TikTok tokante e bakuna di Pfizer.

Tin un notisia falsu kaminda Korea a stòp dirèkt ku bakuna despues ku 48 hende a fayasé despues ku nan a risibí e bakuna. Tambe e notisia ta bisa ku Korea lo ta e promé pais ku ta boga pa stòp dirèkt ku prekmentu di e bakuna.

E notisia aki ta falsu. Den e potrèt por wak klaramente ku un hende a post e notisia riba un pagina di media falsu esta “MOS nieuws” kual tin kasi mesun logo ku e kompania di media Hulandes NOS Nieuws.

Tambe Redakshon di Vigilante a tuma nota di videonan riba TikTok ta sirkulando kaminda ta hasiendo chèrchi di e bakuna kontra di Covid-19. E videonan ta algu di dibertí kune, pero e videonan tambe por influenshá un persona pa no bai prek e bakuna komo ku e video a konvensé nan ku e bakuna ta algu malu. Ya tin miles di video ta sirkulando rònt riba TikTok i e video nan aki tambe ta notisia falsu.

Ki ora algu ta notisia falsu?

Notisia falsu ta bin den yen forma, e por bin den un video grabá, artikulo skibí i asta grabashonnan di stèm. E peliger di notisia falsu no ta e notisia mes, pero ora e notisia bai viral. Notisia falsu mayoria biaha tin titularnan ekstremo i esei lo mande viral muchu mas lihé.

E problema di notisia falsu ta na momentu ku hopi hende ta kere esaki i ora e notisia di bèrdat sali afo niun hende lo no kere e notisia bèrdat debí ku esaki a sali mas lat i probablemente lo ta menos viral tambe.

Promé ku bo kompartí un notisia, chèk atrobe e nòmber di e pagina ku a dunabo e notisia. Si e pagina no ta un nòmber verifiká, chèns ta grandi ku ta trata di notisia falsu. Ora bo lesa algu ku ta zona ekstremo, google e lihé lihé pa chèk wak si tin mas media a publiká e notisia. Si esaki no ta e kaso, e orei bo por konkluí ku ta un notisia falsu bo a kai aden.