Flèt kaminda e asesinato a tuma lugá.

Delft,– Un hòmber nasé na Kòrsou ta risibí un kondena di 10 aña despues ku el a hinka i alabes asesiná un hòmber Hulandes usando un kuchú.

Ta trata di un asesinato ku a sosodé mas ku 1 aña pasá riba 4 di òktober 2021. Segun komunikado di outoridatnan Hulandes, riba 4 di òktober 2021 alrededor di 20:30 polisnan a risibí un notifikashon di un persona heridá riba gang di un flèt na Delft. Na yegada di outoridat, polisnan a nota ku e hòmber víktima tabata den un situashon peligroso pues mesora e víktima di 58 aña a kuminsá risibí reanimashon. Durante reanimashon a bin konstatá ku e hòmber a fayesé na e sitio.

Mesora polisnan a kuminsá ku un búskeda di un sospechoso. Mas aleu, reshèrshinan forénsiko a kuminsá buska informashon ku por tabata balioso relashoná ku e búskeda. E siguiente dia riba 5 di òktober 2021 e sospechoso mes a opta pa entregá su mes na warda di polis den bisindario di e asesinato. Ta trata di un hòmber YDK di 32 aña di edat.

E akusado YDK tabata biba riba un forma temporal den kas di e víktima ku a keda asesiná. E akusado tabata biba apénas algun dia den e kas. Riba 4 di òktober 2021, riba dia dje asesinato, un diskushon lo mester a tuma lugá entre e dos hòmbernan. E diskushon a kuminsá debí ku e akusado tabata laga e kas tur bruá. Algun ora promé e víktima a laga vários tas di paña pafó di e kas ku meta pa saka e akusado for di e kas. Despues di algun ora, na momentu ku e víktima ku e akusado a topa kara kara dilanti e kas, un diskushon a kuminsá ku a kulminá ku un bringamentu fatal.

E bringamentu a finalisá ku e víktima a risibí 10 hinká ku kuchú. Den promé instante defensa di e akusado YDK a diskutí ku ta trata di defensa propio, pero wes no a bai di akuerdo ku e diskushon dje defensa. Segun wes, na vários okashon e akusado a kambia su deklarashon pues e deklarashon nan no por ta konfiabel. Alabes, wes a indiká ku ta imposibel e víktima ta risibí 10 herida pa hinkamentu mirando ku ta un supuesto defensa propio.

Mirando e echonan kastigabel, wes a dikta un sentensia di 10 aña pa e hòmber YDK ku a asesiná un persona na Delft. Tambe e akusado mester paga un suma di 42 mil euro pa daño perwisio na yu di e víktima.