E akusado Christopher Zimmerman a splika hues pakiko e tabata kana armá. Pero su arma no por a keda konektá na e morto dje rèper.

Nieuwe Haven,– Christopher Zimmerman a sinta ayera henter dia dilanti e tribunal di apelashon pa pasa den su kaso penal. Zimmerman ta keda akusá di a embolbí su mes den e asesinato pre-meditá di Boechi riba 9 di desèmber 2022 i tambe e akusado lo tabata den posishon di un arma di kandela.

Durante detenshon di Zimmerman, outoridatnan a haña e hòmber ku un arma revòlver. Pero a bin resultá ku e arma aki no por a wòrdu konektá ku e morto di Boechi. Alabes Zimmerman a opta pa splika e huesnan den korte di apelashon pakiko e ta kana armá.

Zimmerman a splika ku el a krese den un bario konsiderá komo un “ghetto”. “Mi a lanta den bario di matamentu, tiroteo, atrako i ladronisia. Ami nunka tabata un persona ku tabata hasi malu na un otro i dado momentu otro personanan den bario lo tabata asta yamami m*****. Mi a opta pa kana armá pa defendé mi famia”, Zimmerman tabata splika den sala di korte. Mas aleu e hòmber a agregá ku su bario tin un kultura kaminda apesar ku bo no ta hasi malu, bo mester kana armá pa evitá kualke kos chikí, manera ladronisia òf otro delito kontra di bo persona”.

Tambe a sali na kla ku ekskluyendo e insidente riba 9 di desèmber 2022, Zimmerman lo a embolbí su mes den 2 kaso di tiroteo. Pero mesora e akusado a splika ku un dje tiroteonan ya kaba el a risibí kastigu pa esaki i pa e segundo delito semper el a enfatisá ku e ta kla pa risibí su kastigu. Zimmerman alabes a splika ku e problema ta ku si no tin nada di hasi, klaro kos (malu) ta drenta bo kabes. Na momentu ku haña un trabou un persona lo no tin tempu pa kòrda mes riba asuntunan relatá na arma di kandela.