Back to Top
Responsive image
E korant di pueblo

Zita no ta konfirmá pago final pa benta UTS di 54 mion florin


March 27, 2021 • 2 minüt pa lesa

Kontesta: Zita Leito, riba e foto komo e minister enkargá pa benta di UTS no a duna un deklarashon ainda.

Punda—Tin un insiguridat ta sirkulando rondó dje pago final ku Liberty American Cables mester hasi pa kompra di akshonnan den UTS.  Vigilante na diferente okashon a duna splikashon amplio riba e suma total i lokual a keda riba un kuenta intermediario pendiente finalisashon. Ta trata di 53.7 mion florin ku te ainda minister Zita Leito no ta kontestando si Liberty a depositá e sèn.

Si resultá ku en bèrdat Liberty no a paga e kota final di 53.7 mion, ta nifiká ku den práktika for di 339 mion florin ku a bende UTS, ta solamente 12 mion florin ta den kaha di gobièrnu na e momentonan aki. Sperando e pago final di Liberty, siguiente Parlamento di Kòrsou mester yama Zita Jesus Leito huntu ku eks direktor Paul de Geus pa duna kuenta i rason riba e dil ku awe tin komunikashon di Kòrsou kologá.

UTS a wòrdu bendí pa 339 mion florin. Na Fiansa mester a deskontá 78.2 mion pero e kompania tabatin na aktivo i kèsh 52.7 mion. Despues di eliminá fiansa i añadí aktivonan riba e suma ta keda 313.4 mion florin. For di 313.4 mion mester a deskontá e di trapi di debe ku tabata kréditornan na 42.6 mion i fondo di penshun atrasá na 85.8 mion florin. Ta keda 185 mion florin. Pero UTS tabatin mas debe ku nunka miembronan den Hunta di Komisario no a revelá na gobièrnu. Entre nan tabatin 6.1 mion na impuesto, 15.2 na debenan di konseshon i 6.5 mion na debe den derechinan di eksklusividat.  Ora deskontá e di tres trapi di debe ta keda 157.2 mion florin ku ainda no por a bai den kaha di Kòrsou.

For di e 157.2 mion florin, gobièrnu di St. Maarten a claim 19.5 mion florin komo sosio den UTS. Kòrsou a keda ku 137.6 mion florin riba “papel”. Di e 137.6 mion ku mester a bini Kòrsou despues di a paga tur kos atrasá di UTS, Liberty a reserva 53.7 mion florin pa subi un kuenta intermediario ku mester a kanselá na e luna aki na 2021. Esta mart 2021. Sin e plaka riba e kuenta intermediario, Gobièrnu di Kòrsou mester a risibi segun kálkulonan, 137.6 mion deskontá 53.7 mion florin ta bira 83.9 florin. Ta konosí ku di e suma aki, 66 mion florin a bai Curaçao Medical Center sin ku niun konfirmashon eksakto a yega pueblo di Kòrsou. Despues di deskontá 66 mion florin ta keda 17.9 mion florin. 6 mion florin mester a bai bek Flow, lokual segun konteo di Vigilante a keda 11.9 mion florin. Esei ta lokual mester ta den kaha di gobièrnu di Kòrsou despues di a bende UTS pa 339 mion florin.

Login