Beijing,- Outoridat polisial na China a kuminsá un investigashon despues ku 21 persona lo mester a pèrdè nan bida despues di un “Ultra Máratòn”di 100 km. Segun testigunan, wer ekstremo durante e evento tabata e rason ku hopi hende a fayesé.
Un ultra Máratòn ta un evenemento kaminda koredónan lo mester kore un distansha di 100 km. Den mayoria kaso e eventonan aki ta tuma lugá den mondi, seru i lugánan no tan konosí. Outoridat den e region di Gansu a kuminsá un investigashon kaminda 21 partisipante ku a partisipá den un ultra máratòn a fayesé riba djasabra 22 di Mei.
E kareda ku tabata tin 172 partisipante lo mester a kuminsá e kareda. Media lokal a kuestioná e evenemento kaba despues ku e organisadónan a ignorá e atvertensha di wer ekstremo ku lo yega den e region. E wer ekstremo a dal den un sekshon den un seru haltu i diferente partisipante a duna di konosé ku e temperatura a baha te na -24 grado Celsius.
Un otro partisipante ku a skapa na wowo di angua a bisa ku e ta kòrda ku na momentu ku el a primi e kònòpi di SOS pa haña yudansa, el a kai flou dor dje friu. Pero ta un kunukero a yud’é dor di sende un kandela ya e por a keda poko kayente durante e friu inmenso riba e seru.
Luo Jing, partisipante dje máratòn, a bisa ku e na momentu ku e tabata baha e seru. El a tuma nota di basta hende ku problema di kore debí ku nan tabata tin solamente un T-shirt i karson kòrtiku bistí.
Dos víktima ku lamentablemente a bin pèrdè nan bida ta Liang Jing i Huang Guanjun. Tur dos ta konosí di gana e tipo di evento pisá akí.
E organisadónan a risibí basta kritiká riba ret sosial despues ku e suseso aki a sali na kla. Mas ku 84mion persona a lesa tokante e suseso riba e ret sosial Chines “Weibo”.
Organisashon di deporte na China a saka instrukshon tokante kon pa drecha e seguridat di atleta durante e tipo di eventonan aki.