SCHIPHOL—E kantidat di pasaheronan via Schiphol a dòbel den 2022 i a alkansá 52,2 mion pasahero kompará ku 25,5 mion den 2021.

Apesar di e oumento Schiphol ainda no ta na nivel di promé ku coronavirus. Den 2019 Schiphol a atende 71,1 mion pasahero. E airport a keda konfrontá for di vakashon di mei ku skarsedat di personal ku a okashoná tempunan di espera largu, algu ku Tweede Kamer i sindikatonan a atvertí p’e. E kaos grandi ku filanan largu na seguridat Schiphol ta atribui na skarsedat grandi di personal i no na su propio fayonan segun NH Nieuws. Meimei di e kaos direktor di Schiphol Dick Benschop a tuma retiro. Entretantu el a keda remplasá pa Ruud Sondag. Segun sindikato FNV ainda tin gran skarsedat na airport i e sindikato ta teme pa kaos nobo. Schiphol lo no ta kla pa zomer, segun lider di kampaña di FNV Joost van Doesburg. E airport ta organisá huntu ku otro kompanianan di aviashon un merkado laboral pa resolve e problema. For di zomer 2021 tin un limitashon pa e kantidat di pasaheronan i vuelonan ku ta sali for di Schiphol. E medida ta konta te fin di mart. Otro siman Schiphol ta anunsia si a haña sufisiente personal pa eliminá e limitashon.