Tènker Everest wardando pago subi kuenta pa bai ku fuel oil. Pero, tin mas plan ku e fuel oil, entre nan hiba e produkto un destaho públiko.

Bullenbaai—E novela di fuel oil den tankinan di Bullenbaai, kisas ta yegando su etapa final. Un suma di 9.2 mion dòler a subi kuentanan di e kompania estatal pa pago di e hür atrasá. No ta konosí ta “ken” a paga, pero ku e pago aki, si ta korekto, no por imponé embargo mas riba e produkto.

Te ku ayera mainta, Refineria di Kòrsou no tabata por a duna un konfirmashon di e notisia. Segun bosero a duna di konosé: “te ainda e findishi ta planeta”.  Pero fuentenan interno na e kompania a revelá informashon. Ku e pago di hür atrasá, Lead Group, kende ta claim propiedat di e fuel oil, por inisiá e proseso pa saka e produkto for di Kòrsou pa benta riba merkado internashonal. Na Kòrsou a surgi un bataya formal pa propiedat di e fuel oil. E grupo di Raul Soccoro, propietario di SOCAP huntu ku eks sosionan den Caribbean Petroleum Refinery a kuminsá bringa ku Erchenel Doran, kende tabata nan sosio lokal. E bataya tabata pa derechi riba e fuel oil kontrabanda den tankinan na Bullenbaai. Den e trayekto di sèn, a bin deskubrí un otro kompania panameño, bou di KNOB Trading ku tabata paga pa hür e alokashonnan na Bullenbaai. Pero bankonan a bin para tur transakshon di KNOB pa Kòrsou, debí na legitimashon ofisial di e fuel oil. A surgi despues dos intento di beslag ku korte a otorgá pa despues despensá tur embargo riba e fuel oil.

Konsekuentemente un kompania nobo a paresé pa claim e fuel oil. Ta trata di Lead Group, tambe di Panama. Lead a manda nan konsehero “top gun”, Fransisco Mancelli pa atendé e asuntunan riba e fuel oil. Mancelli a logra kombensé korte na Nieuwe Haven pa eliminá tur embargo riba e fuel oil pa nan por paga CRU e hür atrasá i asina bai ku 20 mion dòler balorá na fuel oil. Ayera, Lead Group mester a logra trese un kumpradó legítimo pa e fuel oil. Unabes bankonan aseptá e pago di e kompania legitimatisa, e fuel oil por sali for di Kòrsou. Sino, 1 di Novèmber benta di e fuel oil ta bai destaho públiko.

Manera ampliamente publiká den Vigilante na diferente okashon, e fuel oil den tankinan na Bullenbaai ta fuel oil kontrabanda. Esei a kousa hopi problema pa Curaçao Refinery Utilities tabata por a risibi pagonan for di e kompanianan internashonal, relashoná ku e fuel oil. For di Ougùstùs último, abogadonan di Refineria di Kòrsou a menasa di pone e fuel oil riba destaho públiko i bend’é.

Entretantu, Caribbean Petroleum Refinery BV, Lead Group i KNOB Trading a haña un kumpradó riba merkado internashonal i pa mas tardá, esta mañan e kompra ta tuma lugá pa CRU por risibi e suma atrasá na hür di 9.1 mion dòler estado unidense. E benta di e fuel oil mester a tuma lugá promé ku 1 di Novèmber sino e destaho ta tuma lugá. Awor ta Lead mes kende ta propietario di e fuel oil ta bai hasi e benta na un kompania “compliant”, kual kompania ta kapasitá pa hasi e trámitenan nesesario di pago unda CRU su debe tambe ta keda kanselá. Kon e struktura di debe ta tuma lugá no ta konosí.

Si Lead no logra e abogadonan di Refineria di Kòrsou ta bai vindishi ku e lote di fuel oil den tankinan di Bullenbaai. Refineria di Kòrsou no ta dunando reakshon riba e último desaroyonan pa lokual ta trata e destaho di e Fuel Oil. Korte Sivil mediante un veredikto den Wisio Sumario a kita un beslag ku eks sosionan di e kompania Caribbean Petroleum Refinery BV (sosionan venezolano) a laga pone riba e fuel oil. Eks sosionan a laga pone beslag pa sigurá ku e kompania di Knob Trading i tambe Lead Group, ámbos di Panamá no saka e fuel oil for di Bullenbaai.