E evento tabata bon bishitá na Finca Piscadera.

WILLEMSTAD,– Riba djaweps, 20 di Aprel ACU a tene un enkuentro pa sosionan penshonado di ACU. Enkuentro ku a tuma lugá den oranan di mainta na Finka Piscadera tabata un evento eksitoso mirando e kantidat di sosio ku tabata presente.

E enkuentro ku a habri ku orashon tabata tin un evento kompleto. Despues di orashon tabata tin charla tokante e importansha di salú, siguí pa algun palabra di bestür di ACU pa despues e enkuentro finalisá ku diferente aktividat sosial pa e miembronan penshonado. Segun direktor interimo, Valeska Richards, ACU a opta pa organisá e enkuentro pa sosionan penshonado debí ku ya algun tempu a pasa sin ningun aktividat a wòrdu organisá. Tambe Richards a yama tur sosio danki di ta miembro di ACU.

Próksimo añanan ACU ta bai ofresé mas produkto finansiero. Banda di fiansa personal, kuenta di spar i seguro, ACU ta bai ofresé sosionan posibilidat pa sera un hipotek i tambe posibilidat pa sera un fiansa pa negoshi. Segun Nathalie van Sprang, tin algun aña kaba ku sosionan ta pidiendo un posibilidat pa ACU kuminsá ofresé produktonan di finansiamentu di kompra di kas. Tambe lo bai tin e posibilidat ku sosionan por trese nan hipotek aktual na ACU.

E statüt nobo di ACU ta duna e koperativa posibilidatnan pa finansiá negoshinan di sosionan. Segun van Sprang, e produkto finansiero aki lo bira posibel den e segundo término di aña. Mas aleu, ACU ta bai amplia nan produktonan di seguro. Mas aleu Nathalie van Sprang a indiká ku e preisnan di seguro lo bira sumamente atraktivo mirando ku ACU ta un koperativa.