Marianela de Lanooy dunando splikashon amplio tokante e efektonan negativo di e malesa di suku.

Willemstad,– Ayera den ofisina prinsipal di ADC a lansa e kampaña “Kumpra konsiente pa un bida salú”. E meta dje kampaña ta pa informá tokante e malesa di diabétis.

Nina Winklaar di ADC a splika ku e intenshon ta pa entrante 8 di novèmber e bùs di salú ta bai na diferente supermerkado. Klientenan di e ku bishitá nan supermerkado preferí por hasi un tèst básiko di malesa di suku. Basá riba e resultado di e tèst básiko, e tim di diabétis di ADC lo duna e bishitante rekomendashon si e mester bai dòkter di kas i alabes e tim lo kòmbersá ku e bishitante pa konsientisá tokante e malesa di suku.  Basá riba e agènda di ADC, e bùs lo bishitá e supermerkadonan mas grandi kual ta Van den Tweel Supermarket, Esperamos Supermarket, Carrefour market i Mangusa Hypermarket. E bùs lo keda stashoná na e supermerkado henter dia kaminda por hasi tèst di diabétis riba forma grátis.

Meskos ku otro partinan di mundu, Kòrsou tambe ta eksperenshando un oumento di kasonan di diabétis. Tin sufisiente data ku ta indiká ku diabétis tipo 2 kual ta e diabétis ku por wòrdu prevení, ta e forma di diabétis ku ta oumentando riba forma rápido. Ta asina ku Marianela de Lannoy, dietista na ministerio di GMN, a indiká ku por nota ku e poblashon 30+ ta pasando den un oumento di e chèns pa haña diabétis tipo 2.  Mundu médiko konosé dos diferente tipo di malesa di suku. Diabetes tipo 1 i diabetes tipo 2. Gran parti di personanan ku tin malesa di suku tin diabetes tipo 2 kual ta algu ku por wòrdu prevení. E mihó prevenshon ta pa adaptá e manera di kome i hopi hende mester wòrdu informá tokante esaki segun e splikashon di dietista de Lanooy.

Kaminda ántes bo ta haña e malesa diabétis tipo 2 i un pashènt lo mester biba ku e konsekuensha pa resto di su bida, Marianela de Lanooy a splika ku awendia kos a kambia. Awor  tin sufisiente informashon ku por drai e malesa aki bèk. Segun de Lanooy, na momentu ku adaptá e manera di kome i manera di move, por drai bèk e efekto di diabétis tipo 2 bèk.  E problema no ta malesa, pero e komplikashon ku e malesa ta trese. De Lanooy a indiká ku mas ku 70% di pashèntnan siegu ta personanan ku malesa di suku. E dietista a agregá ku wak kuantu pashènt di dialisando aktualmente, esaki ta un efekto direkto ku diabétis tin riba nos komunikado.