Willemstad,– E aeropuerto Internashonal di Kòrsou a rekuperá kompleto di e konsekuensianan negativo di e pandemia di Covid 19 i a reportá mihó kantidat di pasaheronan ku den 2019.

E rekuperashon ta di 101 % den komparashon ku 2019, aña di referensha pa alkansá e kantidat di tráfiko di turista promé ku e pandemia.

Hato a konta kasi 1 mion i mei di pasahero ku a drenta i sali. Kasi 590.000 pasahero internashonal a sali for di Hato, un kresementu di seis porshento. Kasi 700 mil pasahero a yega na Hato, un oumento di kuater porshento.

E bahada tabata den e tráfiko di pasaheronan pa Aruba i Boneiru, kual tabata un binti porshento bou di e kantidat di 2019.

For di e re-apertura pa tráfiko komersial di pasahero den yüli di 2022, e operadó di aeropuerto kual ta CAP a midi un kresementu kompará ku resultadonan di último trimèster.

Durante e di kuater trimèsternan di 2022, tabatin mas ku 150 mil pasahero ku a sali, un bahada di dos porshento kompará ku e di tres trimèster.

Den 2022 e partisipashon di merkado oropeo na Hato tabata di 49%, un kaida di nuebe porshento kompará ku 2021. Nort Amérika, prinsipalmente Merka tabatin un partisipashon di 18%, kuater porshento mas ku den 2021. Den Karibe hulandes tabatin un partisipashon di 18% i Sur Amérika 12%, un oumento di sinku porshento kompará ku 2021.

E tasa di e promedio general pa loke ta okupashon, e porsentahe di asientonan okupá pa vuelo den 2022 tabata di 81 porshento, un oumento di un porshento ku respekto e tasa di okupashon promedio di 2019.

Segun e  datonan, tabatin un total di mas di binti mil vuelo programá ku tabata yega i sali for di Kòrsou i un kapasidat total di mas di 1,8 mion asiento.

E rekuperashon di e kapasidat di vuelonan i asientonan den komparashon ku 2019 tabata di 92 i 99 porshento, respektivamente.