Nina Ansary, defensor di Derecho di Muhé rekonosé internashonalmente.

WASHINGTON/WILLEMSTAD – Nina Ansary a entregá un denunsia kontra Banko Sentral di Kòrsou i Sint Maarten (CBCS) di 1,8 miar florin (990 mion dòler) djamars último.

E ta akusá e banko di ekspropiashon ilegal di su akshonnan den Parman International BV (PIBV), ku ta un kompania di Kòrsou i alabes propiedat di invershonistanan estadounidense. Ansary ta internashonalmente rekonosé komo Defensor di Derechonan di Muhé, i ademas ganadó di premionan komo outor i historiadó iraní estadounidense. CBCS tin 60 dia total pa reakshoná òf entregá un moshon.

Den e dokumentonan ku Vigilante a studia, Ansary ta pidi un mínimo di 110 mion dòler pa 9 diferente demanda. Ta trata akí di: Ekspropiashon den Violashon dje Derecho Internashonal Kustumbrá; Trato Inhustu den Violashon di Derechonan di Tratadonan; Falta di Protekshon i Seguridat-; Medidanan No Rasonabel i Deskriminatorio-; i Ekspropiashon den Violashon di Derechonan di Tratadonan. Tambe di: Inkumplimento di Trato Nasonal i di Nashon Mas Faboresé den Violashon di Derechonan di Tratadonan; Konvershon di Derecho Komun; Enrikesimentu Indebido; i Inkumplimentu dje Deber Fidusiario.

Ansary ta poseé 15,9% di PIBV, ku ta un empresa di 700 mion dòler, ku ta inkluí kompanianan di seguro, bankonan i algu mas di 64 hèktar di propiedat komersial i residensial di uso miksto (inkluyendo bienes di hür kantu di laman). Segun e denunsia: “CBCS a tuma kòntròl di ‘emergensia’ dje kompanianan di seguro di PIBV na 2018 bou di e preteksto di ‘implementá’ un ‘restrukturashon hopi ekstenso i bon pensá’, desaroyá despues di un estudio kuidadoso durante un periodo di 6 luna. Pero asta despues di a usa 280 mion dòler dje invershonnan líkido dje empresa na New York, ku ta sufisiente pa kompletá a restrukturashon, Banko Sentral no a kumpli ku e plan primintí.”

Segun Ansary mas bien, despues di e ‘impakto grandi’ den e ekonomianan di Kòrsou i Sint Maarten kousá pa e pandemia mundial, Banko Sentral ‘a konspirá ku e gobièrnunan di Kòrsou i Sint Maarten, pa ekspropiá e aktivonan di PIBV na interes privá di nan kompinchinan, na lugá di restourá PIBV despues di kompletá e restrukturashon rápidamente’. “Awor animá pa su éksito, Banko Sentral a start plannan pa apoderá di mas di 64 hèktar di bienes di hür na Sint Maarten ku ta den poder di PIBV, asta despues di kantidat di deklarashon públiko di funshonarionan di Banko Sentral tokante e restourashon di e salú fiskal dje empresa.”

Ansary ta haña ku CBCS mester paga no ménos ku 110 mion dòler pa kada un dje 9 demandanan. Ademas e ke pa e banko paga tur gastunan di interes, gastunan adishonal, inkluyendo salarionan rasonabel di abogadonan i gastunan adishonal ku a hasi pa e proseso sivil akí. Tambe e ke pa Korte disidí riba otro reparashon adishonal ku Korte ta konsiderá apropiá. Komo prueba Ansary ta usa entre otro loke èks direktor di CBCS José Jardim a bisa durante un konferensia di prensa konvoká na 2018 tokante e intervenshon den e grupo Ennia. Jardim a splika e dia ei ku Korte a aprobá e medida di urgensia ku CBCS a dekretá.

Elias

Ansary ta baha pisá den e dokumentonan kontra entre otro Jardim i tambe e komersiante Gregory Elias di United Group Holdings BV. Den e esensia e ta splika ku for di momentu ku a tuma kòntròl di e supsidiarionan di seguronan i negoshinan relashoná ku PIBV na 2018, bou di e preteksto di un ‘restrukturashon di emergensia’ supuestamente nesesario pa e supsidiaronan di seguro kumpli ku e normanan, Banko Sentral a embolbí su mes den un kòmplòt pa sistemátikamente sakia e aktivonan dje empresa, pa benefisio ekonómiko i polítiko di su funshonarionan.

Segun Ansary: “E banko a asta hinka un benta innesesario ku un deskuento grandi den otro di Banco di Caribe di ‘solamente’ 120 mion dòler na un labadó di plaka konosí internashonalmente i ku ta ademas kompinchi dje èks direktor di Banko Sentral.” Siendo e balor tabata muchu mas ku 180 mion dòler. Segun Ansary ta yama Elias e ‘rei sin korona dje ret di labament’i plaka i weganan di azar digital mas grandi di mundu’. I e ta referí na e ‘lugá destaká’ ku Elias tin den ‘Panama Papers’, ku a kondusí na un investigashon parlamentario hulandes na 2017. Segun Ansary, tin bisá tambe ku Elias ta ‘duna pais Kòrsou mal reputashon den e mundu finansiero’.