NIEUWE HAVEN—Segun un demanda di kasi 660 mion dòler di Nina Ansary riba Banko Sentral, na Mei 2018 Hushang Ansary, Jose Jardim i Kelvin Kleist a sinta na mesa pa negoshá e problema na Ennia Caribe Leven.

Durante tratamentu di e kaso di Nina Ansary na Estádos Unídos, abogadonan di Ansary a splika ku tabatin un akuerdo entre e partidonan. E akuerdo a enserá ku temporalmente ta re-aloka aktivonan sirkulante di EC Holding i EC Investments invertí na Estádos Unídos pa repago di e  primanan for di penshun ku a sirbi komo garantia pa e invershonnan den ámbos entidat. E areglo lo a enserá tambe ku Banko Sentral no ta bende niun aktivo den Ennia Caribe Holding. Via e transakshonnan, a keda kumbiní segun Ansary ku aktivonan den Sun Resorts (Mullet Bay) i Banco di Caribe den su totalidat ta keda intakto pero tog den forma di garantia. Segun Jose Jardim den korte, niun di e intenshonnan ku Ansary a presentá na mesa tabata serio.

Mas aleu, abogadonan di Nina Ansary, den nan intentonan pa mustra ku Banko Sentral okashoná daño na su persona, a splika tambe ku Banko Sentral a sigui riba un otro ruta. Despues di a logra konfiská 280 mion dòler estado unidense riba kuentanan di invershon di EC Holdings i EC Investment, Banko Sentral a sigui tog ku prosedernan pa bende aktivonan manera e.o. Banco di Caribe i awor Mullet Bay. Segun Ansary públikamente den korte “Jardim i Kleist a mira oportunidatnan personal finansiero”.  Nina Ansary ta alegá ku Jose Jardim konsientemente a retené intervenshon di e.o. BroadSpan Capital di intermediá pa sigui e proseso di benta Banco di Caribe. Esaki despues di e sinta den diferente reunion na Miami ku BroadSpan Capital. Nina Ansary su abogadonan a lansa bastante akusashon kontra di Jardim, Kleist i Grimm. Segun Ansary, tabatin debido interes for di kompanianan na New York pa kumpra Banco di Caribe, pero Jardim a ordená BroadScan pa retrosedé.

Foto

Ninga: Jose Jardim a ninga tur akusashon durante último tratamentunan den korte di apelashon na Kòrsou.