Kashi koriente ku pronto ta wòrdu adaptá pa asina sòru ku molèster di awa lo no afekt’é mas.

Beurs,– E bario di Beurs tabata den notisia atrobe na momentu ku habitantenan prekupá e dokumentá kon un kashi koriente di Aqualectra tabata saka huma durante inundashon di un tormenta inesperá riba djamars último.

Den oranan di mardugá bai kue mainta, un grabashon a dokumentá kon un kashi koriente tabata saka basta huma na momentu ku e kashi a keda parsialmente bou di awa den Kaya John Willekes. E grabashon tabata graba prinsipalmente kon dos kachó tabata trata na skapa nan bida i no hoga den e oranan di mardugá. Pero den e mesun video por nota e kantidat di huma ku tabata sali for di e kashi koriente di Aqualectra.

Debí na e problemanan den e kashi koriente, Aqualectra a opta pa instalá un generator pa asina garantis’a fluho di koriente den e área.  Hefe  tékniko di asuntunan di koriente na Aqualectra, Rudolph Garmes, a indiká na Vigilante ku Aqualectra ta na altura di e situashon di e kashi di koriente i mirando ku e kashi koriente ta aktualmente e punto mas abou den e bario, awor a bira tempu pa invertí pa hisa e haltura di e kashi di koriente. Segun Garmes, atraves di tempu, habitantenan den Kaya John Willekes, mes a opta pa hisa nan murayanan i entrada di kas. E hisamentu di muraya di entrada a sòru awor ku tur awa ta bai para na e kashi koriente i akinan e situashon peligroso ta desaroyá.

Segun Garmes, aktualmente mester wak ki dia awaseru ta kai ménos pa asina Aqualectra por kuminsá ku e trámitenan pa drecha i mehorá e situashon di e kashi koriente. Mester kuminsá hisa e pida tereno ku e kashi koriente ta riba dje. Siguí pa buta un kashi koriente nobo “prefab” i asina kontektá e bario di nobo riba e kashi konserní. Segun Garmes, e gastunan ta keda finansiá dor di Aqualectra i kalkulashon nan ta demonstrá ku e invershon lo ta entre 50 mil pa 70 mil florin.

Garmes no por a komentá tokante e inundashon di awa, pero e hefe na Aqualectra a indiká ku Aqualectra ta hasi nan parti pa asina sòru ku e habitantenan no haña problema ku koriente mas.