Segun Jonis Aqualectra mester a kambia e modelo di negoshi pa garantisá ‘longevity’ di e kompania.

Willemstad- Sr. Darick Jonis kende ta direktor di Aqualectra ta duna di konosé ku entre mei mei pa fin di aña 2023 Aqualectra su ret pa telefòn selular lo ta operashonal.

Sr Jonis ta splika ku mundialmente tur kompania ta diversifikando nan mes. Desaroyonan agresivo a bira parti di nos bida. Jonis ta duna ehèmpel riba e merkado di awa ku koriente kaminda hopi kompania ta opta pa hasi uzo di panel solar. Awendia tin 21 mega watt di panel solar ku ta instalá riba daknan. Esaki ta tradusí su mes ku e demanda di èrko den dia ta wòrdu kompensá ku panel solar.

 Pues Jonis ta splika ku si bo mantené e mesun modelo di negoshi, al final bo medelo ta bai deteriorá te ku e ta kaba na nada. bo tin ku kuminsá adaptá e modelo di negoshi pa por sobrebibí den futuro. Esaki mirando ku ta trata di un kompania di utilidat i mester perkurá pa e kompania por ta den servisio pa hopi aña. Pa e motibu aki tambe Aqualectra ta hasi e trabou di konsulta pa e kompania di energia na Statia.

Riba e merkado kompetitivo Jonis ta splika ku Aqualectra ta yudando kompanianan lokal ku awa di ménos kalidat. Esaki ta wòrdu uzá pa muha mata i tambe pa awa di pisina. E awa ta bon sinembargo no ta e kalidat di awa pa bebe i e ta mas barata. E awa di bebe su kalidat ta mas haltu. Jonis ta splika ku si Aqualectra no drenta den e merkado aki, otro kompania komersial si ta hasié i lo tin un pèrdida di e kliente ku no ta bai haña nada na su lugá. Esaki ta un benta di ménos volúmen na e kliente sinembargo bo ta bendé den banda i haña mas márgen.

Riba e filosofia aki a yega na Aqutel. Jonis ta splika ku tin un ret fiho di fibra óptiko na Kòrsou instalá dor di Aqualectra mes. E idea no ta pa kompetí ku esnan ku ta proveé telekomunikashon aktualmente. E idea ta pa pone e infrastruktura disponibel pa tur hende pa asina por mehorá. Uza otro su infrastruktura i sòru pa esaki ta bon. E ora ei por kompetí ku otro riba produkto i servisio kual segun Jonis esei tin mester na Kòrsou. e trayekto ta kanando segun e lisensia di Aqualectra pa bini ku un ret di telefòn selular ku por ser poné riba merkado lokal.