WILLEMSTAD, — Ta konosí ku inflashon ta redusí forsa di kompra, spesialmente den kaso ku no tin indeksashon di salario i penshun.

Sin embargo, loke hopi hende no ta realisá ta ku inflashon por tin un impakto paresido riba sèn  di spar  (ahoro) tambe. CBCS a kalkulá ku na 2022, balor real di sèn i spar na bankonan lokal
den union monetario a baha ku aproksimadamente NAf. 146 mion. Esaki ta debí na e
nivel rekòrt di inflashon, ku a superá e tasanan di interes risibí riba kuenta di spar. Si
inflashon lo keda na un nivel mas haltu ku e tasanan di interes riba kuenta di spar, e
efekto negativo akí riba sèn ispar probablemente lo kontinuá den e añanan benidero.

For di perspektiva ekonómiko, ahoro di kas di famia ta un fuente importante di
finansiamentu di invershon i, di e manera ei mes tambe, di aktividat ekonómiko. Un
enkuesta resien di Centrale Bank van Curaçao en Sint Maarten (CBCS) i Ofisina Sentral di
Statistik ta indiká ku na Kòrsou, aproksimadamente 52% di poblashon adulto tin un kuenta
di spar i na Sint Maarten, aproksimadamente 73%. Na desèmber di 2022, personanan den
union monetario tabatin, na tur, NAf. 2,77 miar na sèn ispar (definí komo depósito di spar
i depósito na plaso di kas di famia) na bankonan komersial lokal. Komo promedio, e
tasanan di interes riba kuenta di spar personal tabata 1,2% entre 2017 i 2022. (Pa depósito
di spar, e promedio ta aproksimadamente 1,1% i pa depósito na plaso, aproksimadamente
2,0%.) Na mes momento, inflashon den union monetario ta mustra un tendensia di
oumento, ku un promedio di 3,1% entre 2017 i 2022. Tasa di interes negativo, esta, e
diferensia negativo entre tasa di interes nominal i inflashon, ta baha balor di bo sèn ispar
asta si bo ta akumulando interes riba dje. Ku otro palabra e ta pone ku, komo spardó, bo
por kumpra ménos produkto i servisio ku e mesun kantidat di plaka ispar.

Entre 2020 i 2022, e kantidat total di ahoro personal den union monetario a oumentá ku
kasi NAf. 320 mion. Sin embargo, na 2022 e efekto negativo di inflashon tabata di NAf. 179
mion, miéntras ku, segun kálkulo, e interes akumulá tabata solamente NAf. 33 mion. Debí
na inflashon, balor real di e sen di spar a baha ku por lo ménos NAf. 146 mion na 2022.
Maske a nota e efekto negativo aki di inflashon riba sèn ispar, CBCS ke enfatisá ku
sparmentu ta, i ta keda, un manera importante pa krea bùfer pa término kòrtiku i alkansá
meta riba término largu.