Willemstad,  —- Un delegashon di Konseho Sosial Ekonómiko (SER) a hasi un bishita di trabou na Refineria di Kòrsou (RdK) djaweps, 5 di òktober 2023. E delegashon di SER tabata bou di guia di Sr. John Jacobs, Presidente Interino, i drs. R.J. Henriquez, Direktor/Sekretario General. Nan tabata akompañá pa diferente miembronan di e konseho i tambe konseheronan. Representando RdK tabata tei Sr. Patrick Newton, Direktor Interino, i Sra. Jessica Russel-Lucasius, responsabel pa e Organisashon pa Maneho di Aktiva.

RdK, ku ta doño di refineria Isla, ta responsabel pa e redesaroyo i lease di e sitio. E bishita a kuminsá ku un presentashon detayá riba e plannan stratégiko di RdK pa término kòrtiku i largu. Atenshon partikular a keda poné riba e reapertura pendiente di e refineria i e traspaso amplio pa energía renovabel. Otro tópikonan di enfoke den e presentashon tabata inkluí re-desaroyo di e sitio i strategianan pa remediá e daño medio ambiental okashoná pa aktividatnan di rafinahe.

E presentashon tambe a trata e posibel kontribushon di e inisiativanan aki na ekonomia i komunidat di Kòrsou. Ambos partido a evaluá e bishita di trabou komo sumamente konstruktivo i ta optimista tokante e impakto di nan kolaborashon riba e panorama sosio-ekonómiko di Kòrsou. E bishita a surgi komo resultado di un petishon resien sometí na SER pa konseho relashoná ku un proyekto di lei pendiente ku mester regulá kalidat di aire i tambe komo resultado di interakshonnan anterior ku RdK i CRU (Kòrsou Refinery Utilities N.V.).