Cooper ta splika ku pa medio di DHPC nos lo kombiná ekspertisio di kompanianan establesé ku konseptonan inovativo i étika profeshonal, ku e ophetivo pa ko-krea servisionan digital nobo pa Karibe.

Willemsyad,– Segun minister Charles Cooper e akuerdo di produkshon di koriente entre Blue NAP Americas ( nos Data Center) i Aqualectra ta un bon ehèmpel kon kompanianan di gobièrnu por kolaborá, pa asina ámbos benefisiá, pero prinsipalmente riba un manera ku komunidat en general tambe por bai dilanti.

E minister ta bisa ku esaki ta kuadra den e vishon pa krea e asina yamá ‘Digital Hub Platform Curaçao’ òf ‘DHPC’, kaminda lokalemente partidonan ta kolaborá pa huntu ko-krea i kolaborá pa desaroyá Kòrsou den un punto importante pa desaroyo digital i partisipashon di Karibe den ekonomia digital. Cooper ta sigui splika ku pa medio di DHPC nos lo kombiná ekspertisio di kompanianan establesé, ku konseptonan inovativo i étika profeshonal, ku e ophetivo pa ko-krea servisionan digital nobo pa Karibe.

E ta bisa ku Blue NAP i Aqualectra ta duna kontenido real na e kolaborashon nesesario i ku ohalá e paso aki inspirá demas partidonan pa uni na e esfuerso mayó akí i aselerá desaroyo di nos Digital Hub Platform Curaçao. Pa loke ta Blue NAP mes, minister ta bisa ku esaki ta un paso importante den hasi e data center mas atraktivo pa kliente i partnernan, ya ku e ta bira un kompania ku tin un mínimo kontribushon na e asina yamá ‘carbon footprint’. Esaki sigur ta un bentaha ku ta atraé un gran kantidat di kompanianan ku ta duna balor haltu na konservashon di nos planeta i por último e minister ta splika ku e akuerdo di produkshon di koriente aki lo añadí na e posishon kompetitivo di Blue NAP, ya ku e lo kontribuí na redukshon di e gastunan operashonal di e kompania. Esaki sigur lo tin su efekto positivo riba e posishon kompetitivo di Blue NAP.•