Kontròl: Invest NL i RVO ta dos instrumento ku van Huffelen lo mester uza pa sostené ehekushon di COHO na Kòrsou.

Punda—Pa por garantisá ehekushon di COHO, den kuadro di klima di invershon, Hulanda ta hasi uzo di e institushonnan Invest NL i RVO. Ta trata di dos organisashon pa duna sosten na e mundu empresarial. Segun e deskripshon general di COHO, ámbos organisashon ta disponibel durante ehekushon di COHO.

Ta importante pa komersiantenan lokal den nesesidat di sosten, investigá e parti importante aki, si akaso COHO kontinuá. E ulandesnan, mediante Invest NL ku tei haña pèrmit na Kòrsou, lo tin akseso na 180 mion florin dirèkt fo’i fondonan ulandes pa finansiá proyekto. E lei proponé pa Hulanda ta un plan ku tin hopi derivado. Na promé lugá e struktura di garantia pa rekuperá ekonomia di Kòrsou ta kai dirèkt bou di RVO na Ulanda. RVO ta Rijksdient voor Ondernemend Nederland. Ku e garantia aki, Invest NL ta den posishon pa sea direkto of indirekt lanta sukursal di operashon na Kòrsou. Komersiantenan i invershonistanan den búskeda di fondo por yega na remarke pa finansiamentu. RVO na Ulanda, lo ta esnan enkargá pa garantisá invershon durante 2020 pa 2027, den kual por lo ménos 470 mion ta fondonan akoplá fo’i benta di propiedat kurasoleño. Sin aprobashon di RVO, niun proyekto di invershon no tei sigui.

Promé di a proponé e Lei di Konsenso COHO, Hulanda kier a laga InvestNL yuda establesé un banko similar na Kòrsou, Invest Curacao. Pero Invest Curaçao, a disparsé for di mapa na momento Hulanda a anunsiá e Entidat di Karibe i despues COHO. Den e Akuerdo di Kresementu na 2019, Hulanda a instruí Kòrsou, pa kapitalisá e instituto Invest Curaçao. Esaki lo duna Kòrsou derechi pa fia for di fondonan ulandes, e suma di 180 mion florin repartí den 3 aña. Invest Curaçao mester a risibí e suma di 180 mion pa yuda stimulá ekonomia via di e kuenta di kapital. Awor segun deskripshon di COHO, e tarea lo keda den man di Invest NL.