Yamil Lasten

PUNDA—Segun Yamil Lasten, na momento Curoil kumpra kombustibel riba merkado internashonal esaki ta sosodé konforme un liña di maneho estatal establesé pa gobièrnu. Lasten a papia ayera durante un rueda di prensa na Fòrti Amsterdam.

Yamil Lasten,ayera a splika e proseso di kompra di kombustibel. E direktor di Curoil a splika ku komo kompania di Gobièrnu nan mester atené na e proseso di diligensha responsabel. Na momento tin nesesidat di gasolin, Curoil ta emití un destaho unda provedornan por inskribí (tendering). Curoil seguidamente den un departamento interno, ta evaluá kua provedor tin e mihó oferta.

Mas aleu tambe Lasten a splika ku tin liñanan di maneho stipulá pa gobièrnu riba kalidat di kombustibel na Kòrsou i Curoil mester keda mantené su mes na e liñanan di maneho. E direktor di Curoil a deliberá tambe riba e rapòrt di SGS Inspire. Segun Lasten tin un grupo di trabou pa stipulá e kondishonnan nobo riba e kalidat di kombustibel. E direktor a bisa tambe ku na e momentonan aki ta trahando den un grupo di trabou pa sondia e provedornan, ku por kumpli riba e kondishonnan i rekomendashonnan den e rapòrt di SGS Inspire.