Un bista di e kantidat di but ku a keda repartí

Willemstad— E dama Bonifasio ku tin un krio di mas di 200 kachó no tabata di akuerdo ku un but kua  ela haña dia 17 di òktober  último pa kore un vehíkulo sin esaki su number tabata paga.

E dama a deklará den Korte ku e no ta di akuerdo ku e but ku e la haña pa kore un vehíkulo sin number ya ku su situashon finansiero no ta esun di mas mihó.   Segun e dama tabata dia 17 di òktober ku e la wòrdu para riba Winston Churchillweg na altura di Furniture Pallace durante di un kontròl di polis. E dia ei e la haña un but pa manehá un vehíkulo sin esaki su impuesto ta paga. Segun e dama kon e la roga serka e polis pa e no haña un but esaki no kier a skuch’é. E dia ei e la sali kas debí ku e la haña un melding di un kachó di kaya ku tabata malu. Segun e dama no ta laga un kachó sufri ora ku e haña notifikashon i pa e motibu ei e tin un krio di mas di 200 kachó kual e ta kuida nan esakinan riba su propio forsa. E no ta haña niun yudansa di Gobièrnu pa ku kuido di e kachónan aki i ta biba di un ònderstant for di kual e ta kuida su mes, su yunan i tambe su nietunan. Segun e dama e ta pidi pa hasi e but mas abou di manera ku e por paga esaki.  Fiskal a mustra ku ta proba ku e dama a kometé un infrakshon dor di sali riba kaya ku un vehíkulo sin ku esaki su number tabata paga . Pa esaki e ta hasi un demanda di 150 florin di but. E dama tabata basta indigná ku e demanda di Fiskal. Hues a tuma desishon mesora i a splika e dama ku ta proba ku e tabata manehá un vehíkulo sin impuesto paga ya ku e mes a atmití esaki.  Hues a yega na un but konforme e demanda di Fiskal esaki 150 florin òf 3 dia di enkarselashon si e no kumpli ku esaki.  E dama basta hostiná a indiká mesora ku e lo apelá e sentensia.