ROTTERDAM—E konstruktor di barkunan Damen ta eksigí kompensashon di gobièrnu hulandes pa daño finansiero okashoná pa sanshonnan kontra Rusia.

E konsorsio a entama un kaso den korte, Damen a konfirmá. Despues di invashon di Rusia den Ukraina Union Oropeo a introdusí kantidat di sanshonnan kontra Rusia. Entre otro eksportashon di teknologia naval a keda prohibí den februari 2022. Damen tabatin kontratonan ku klientenan ruso promé ku e guera pero no por a entregá e barkunan ku nan a bende. Esaki a kosta e astiyero hopi plaka i pa esei Damen kier kompensashon. Pa esaki e kompania a bai korte di Rotterdam den mei. Ta spera e veredikto otro aña.