Charles Cooper: deskuento solamente den kasonan ku tin defekto den konstrukshon.

Skalo – Minister Charles Cooper di Tráfiko, Transporte i Planifikashon Urbano (VVRP) ta splika pueblo riba preguntanan di Parlamentario Ana Maria Pauletta di PAR tokante e reglanan pa ku benta di kasnan di pueblo.

E Parlamentario tabata ke sa si gobièrnu ta duna deskuento i segun e Minister esaki bèrdat ta posibel, pero solamente si e kas tin defekto den konstrukshon. Ya Cooper a instruí su ministerio kaba tambe pa hasi un investigashon i prepará un proyekto di lei pa hisa e suma máksimo di rebaho ku por duna (3500 florin), debí na defektonan den konstrukshon. E proyekto di lei akí, mi ta spera lo yega Parlamento na kuminsamentu di 2024.”

E Parlamentario a mustra e Minister riba e dekreto A.B. 1962 ku ta dun’é e oportunidat pa duna un rebaho riba e preisnan di kasnan. Minister Cooper tabata sa esaki. El a amplia ku den artíkulo 2 insiso 2 dje dekreto akí tin stipulá ku: “Aan de koper kan een korting op de restantwaarde worden verleend. De grootte van deze korting wordt bepaald volgens richtlijnen vast te stellen bij eilandsbesluit houdende algemene maatregelen.” E kumpradó por risibí un deskuento riba e balor restante. E grandura dje deskuento akí ta determiná segun guia establesé den dekreto ku ta kontené medidanan general (lbham).

Cooper: “Seguidamente den AB 1962 no. 24, gobièrnu a stipulá e kondishonnan pa por duna un rebaho riba e ‘restantwaarde’. Den artíkulo 4 di AB 1962 no. 24 a stipulá: ‘Voor korting komen in aanmerking de woningen waarvan de restantwaarde boven de werkelijke waarde ligt ten gevolge van: a. ondeugdelijke constructie van de woning; b. niet aan de kper te wijten achterstallig onderhoud; c. ongustige ligging van de woning.” Esaki ta nifiká ku e kasnan ku ta bin na remarke pa un rebaho komo konsekuensia di: a. konstrukshon defektuoso di e kas; b. retraso den mantenshon ku no ta debí na e kumpradó; i c. e kas no ta trahá na un sitio faborabel.

E Minister a mustra tambe riba AB 1989 no. 39, den kua gobièrnu a introdusí e asina yamá “verkoopwaarde” (balor di benta) i tambe a bini ku un kambio pa loke ta trata e posibilidat pa duna rebaho riba e preis di benta. “Den AB 1989 no. 39 ta stipulá: “De volkswoning wordt verkocht in de staat waarin de volkswoning zich bevindt. Aan de koper kan op schriftelijk advies van Fundashon Kas Popular een korting op de restantwaarde c.q. verkoopwaarde worden verleend in geval de volkswoning aanmerkelijke bouwkundige mankementen vertoont. De grootte van deze kortin, die het bedrag van f 3.500 niet mag te boven gaan, wordt vastgesteld bij landsbesluit houdende altemene maatregelen”. Pues for di 1 di yanüari 1990 e kasnan di pueblo ta keda bendé den e estado ku nan ta na momentu di benta i por duna rebaho riba preis di benta, solamente si e kas tin defekto di konstrukshon. E rebaho no por ta mas ku 3.500 florin.”

Pauletta tabata ke sa di Cooper tambe si e ta dispueso pa, kuminsando for di 1 di yüli duna e kumpradónan un rebaho pa mantené e preis di kas stabil pa tur e sobrá kasnan ku ta poné pa bende. Cooper: “Manera mi a indiká kaba, konforme e dekretonan eksistente i vigente, e kasnan di pueblo ta keda bendé den e estado ku nan ta na momentu di benta. Tin posibilidat pa duna rebaho, pero solamente si e kas tin defekto di konstrukshon. Banda di esaki, e montante di rebaho ta mará na un máksimo di 3500 florin. A base di un evaluashon di e kondishon di hopi di e kasnan di pueblo, mi a yega na e konklushon ku e rebaho máksimo di 3500 florin den hopi kaso no ta kuadra mas. Pa e motibu akí mi a instruí mi ministerio kaba pa hasi un investigashon i prepará un proyekto di lei pa hisa e máksimo di rebaho ku por duna, debí na defektonan den konstrukshon. E proyekto di lei akí, mi ta spera lo yega Parlamento na kuminsamentu di 2024.”