Por medio di datonan digital lo alimentá e polítika di prevenshon di Ministerio GMN.

Willemstad, — Datonan digital lo yuda fortalesé e plan di polítika di GMN kual ta enfatisá riba prevenshon di malesa.

Plan di polítika di GMN pa 2024 lo enfatisá riba maneho basá riba prevenshon di malesa por medio di datonan digital. E ministerio ke logra prevenshon di malesa por medio di dos rumbo: Un rumbo interno ku ta enfoká riba un ambiente di trabou digital i un rumbo eksterno ku ta enfoká riba aktornan pa kual e datonan ta nesesario.

E rumbo ku ta enfoká riba un ambiente di trabou digital ku ta promové datonan di e prosesonan digital den Ministerio di Salubridat Públiko, Medio Ambiente i Naturalesa (GMN). Esaki ta un asuntu interno di e ministerio den kual tin un estrecho koperashon ku Ministerio di Gobernashon, Planifikashon i Servisio Públiko (BPD). Esaki pa asina Ministerio di GMN kumpli ku e rekesítonan di seguridat di Ministerio BPD pa ku digitalisashon den e ministerio.  

E rumbo eksterno ta enfoká riba distribushon di e datonan pa e aktornan pa kual e datonan ta nesesario. Di e moda aki e aktornan ku ta relatá ku GMN por tin komprenshon di desaroyonan di malesa, analisá di esakinan i tradusí esakinan den trayektonan preventivo. E rumbo eksterno, konosí komo Plataforma di Informashon di Salú (Health Information Platform), no ta konektá solamente ku aktornan tradishonal di kuido ku ta kai bou di e departamentu di GMN.  Distribushon di datonan ta ekstendé tambe na aktornan ku ta brinda komprenshon den e bienestar sosial di siudadanonan.

Por medio di datonan digital ta alimentá e polítika di prevenshon di Ministerio GMN. Esaki ta yuda informá e ministerio tokante di desaroyonan no saludabel bou di nos siudadanonan. Esaki ta importante pa asina por kombatí malesanan ku ta desaroyá for di un edat yòng den nos komunidat. Por pensa na konsekuensia di malesanan ku ta desaroyá dor humamentu di sigaria, kuminda ku ta ser konsumí, i tambe konsumo di alkohòl. Gwendell Mercelina Jr., miembro den parlamento, a indiká den pasado ku prevenshon di malesa médiko mester ta un diskushon muchu mas importante.

Mercelina a splika ku lòs for di e diskushon di e salario di un speshalista, lokual hende no ta papia mashá mas di dje ta prevenshon. “Kiko nos ta hasiendo pa prevení nos hendenan di bira malu”? “Nos nutrishon no ta bon, fo’i chikí nos ta siña pa bebe limonada”. Segun Mercelina, e problema prinsipal den kuido, no ta e speshalista, pero kon nos mester eduká e pais aki pa no bira malu pa nos no yega na e spesialista médiko.