Vehíkulonan ku tabata envolví den e aksidente.

Willemstad—- Un aksidente den Saliña por poko a bira un tragedia ora dos di e shofùr nan envolví a baha kue otro ku sla pa despues a hasi uso di vehíkulo pa trata di trapa otro kuné i kousa destrukshon na otro su vehíkulo.

Djabièrnè 16 di febrüari 2024 alrededor di 12.21’or, Sentral di Polis a dirigí un unidat pa kaya Koronèl C. Winkel pa un aksidente di outo kaminda shofùrnan di ámbos vehíkulo tabata bringando ku otro. Na e sitio polis a bin topa ku e aksidente i dos hòmber ku tabata bringando. Polis a intermediá entre nan i a para e pelea. For di investigashon preliminar a sali na kla ku un di e shofùrnan aki a kore di tal forma, ku e konsekuensia ku nan aksidentá. A kuminsá un diskushon fuerte entre e dos hòmbernan aki ku a tèrminá den un bringamentu, di kua un di nan a risibí basta sla. Dado momento un di e partidonan aki esta e hòmber Ulandes Oropeo mester a drenta den su vehíkulo i a sali tras di e otro shofùr tratando na trapa esaki ku su vehíkulo. E otro shofùr pa skapa su bida a hañ’é ta kore i a bai skonde tras di un trùk di pan unda e otro hasiendo uso di su vehíkulo tabata persiguié. Despues ku e no por a logra di trapa e shofùr di e outo  e la bai bek ku su vehíkulo na e outo i a kuminsá dal esaki kontra di e outo kousando basta destrukshon. Na final  e hòmber ulandes oropeo a baha for di su vehíkulo i a kue un lòk di stür i a pega esaki kontra di e tròt di e outo i e stul pone ku e outo as keda res tratando na kousa daño na e motor.  Polis a detené ámbos shofùr, e hòmbernan D.M di 24 aña di edat nasé na Kòrsou i A.Y.V.D di 51 aña di edat nasé na Hulanda pa maltrato i intento di asesinato. A presentá tur dos dilanti di un fiskal ouksiliar, ku a ordená enkarselamentu di D.M., miéntras ku A.Y.V.D. a keda lagá den libertat despues di interogashon.  Vigilante ku a tuma nota ku e hòmber Ulandes Oropeo den e komunikado polisial aki a keda laga den libertat mesora a tuma kontakto ku e relashonista públiko ku e pregunta kon bini un shofùr ku a okashoná tantu daño i a intentá pa trapa e otro ku un vehíkulo kual ta intento di asesinato por a bai kas. E relashonista públiko di kuerpo Polisial a bai tuma kontakto ku e Fiskal Ousiliar ku a deklará ku nan niun momento e Ulandes Oropeo a bai kas i ku tur dos shofùr ta enkarselá.  E kaso aki ta sigui den investigashon.