AMSTERDAM—Servisio di investigashon fiskal FIOD a detené un hòmber (26) i un dama (29) di Amsterdam relashoná ku froude di invershon mionario.

E duo ta keda sospechá di labamentu di plaka. FIOD ta sospecha ku e hòmber ta kulpabel di robo di 26 mion di invershonistanan. Banda di esaki e hòmber ta sospechá di ofrese servisionan di invershon di permit i falsifikashon di dokumento. FIOD a konfiská un kas di e sospechosonan na balor di 7,5 mion euro. Durante entrada den e kas na Amsterdam tambe FIOD a konfiská tres outo ku balor total di 700.000 euro, prendanan i arte na balor di 1,5 mion euro, paña i otro artikulonan di luho. Despues di interogashon outoridatnan a laga e dama bai. A presentá e hòmber na hues komisario ku a prolonga su detenhon ku dos siman. E investigashon penal di FIOD a start despues di denunsia di outoridat merkadonan finansiero AFM kontra e hòmber. AFM ta sospechá e hòmber di duna servisionan di invershon sin lisensia. Diferente banko a meldu transferensianan kuantioso riba kuenta di e hòmber sin splikashon. Segun e bankonan e fluho di plaka lo mester ta un wega di pyramid, kaminda ta paga un invershonista rendimentu ku plaka di otro invershonista. FIOD ta sospechá ku e sospechoso asina a kita 26 mion euro di invershonistanan i tabata laba e plaka ku kompra di outonan luhoso, prenda, arte, vakashonnan karu i hur di avionnan privá. E investigashon ta bou di guia di Parket.