Gobièrnu ta hiba un maneho den su skolnan públiko di forma imparsial

 WILLEMSTAD – Ministerio di Enseñansa, Siensia, Kultura & Deporte (ESKD) ta duna enseñansa na alumnonan sin priveligiá ningun organisashon i denominashon religioso.  Tur organisashon i denominashon religioso ta keda respetá i huntu ta traha pa duna edukashon den harmonia.

Direktiva di Skol Públiko (DOS) ku ta forma parti integral di Ministerio di ESKD ta duna enseñansa di forma imparsial. Skolnan públiko ta akseptá tur alumno i no ta diskriminá ningun pa motibu di religion, ni desendensia, ni sekso, ni kredo.

Basá riba vários informashon riba medionan sosial, a opta pa aklará e situashon relashoná ku e obra teatral ku a keda presentá resientemente na skolnan públiko. E obra aki a keda presentá na 6 skol na novèmber di aña pasá i e aña aki a presentá e obra na 4 skol. Direktiva di Skolnan Públiko ta na altura di e presentashonnan akí.

E skolnan konserní a informá e mayornan di e obra teatral aki kumpliendo asina ku e maneho di Direktiva di Skolnan Públiko pa duna informashon debido na mayornan ora ta trata di kualkier aktividat ku skolnan ta bai organisá òf partisipá na dje. Mayornan ku no tabata ke pa nan yu partisipá a informá esaki na e skol konserní i desishon di e mayornan aki a keda respetá pa e skolnan.

Ta bon pa informá ku den nos kuríkulo di enseñansa tin un área di edukashon: ‘filosofia di bida’ (na hulandes ‘levensbeschouwing’), meta prinsipal ta pa siña nos alumnonan konosé diferente kultura komo parti di nan desaroyo personal. Di e forma aki, ta trese diferente pensamentu huntu i ta laga nos alumnonan interkambiá tokante esakinan riba un base di igualdat. Den e kuadro aki tin vários skol ta laga e alumnonan partisipá na diferente formanan kreativo pa alkansá e metanan di edukashon: ‘filosofia di bida’.

E obra teatral ku a keda presentá ta simplemente pa nos alumnonan sera konosí i interkambiá riba e áreanan kultural diverso ku nos ta biba aden.  Skolnan Públiko tin un prosedura establesé pa evaluá e tipo di aktividatnan aki i den e kaso spesífiko aki, funshonarionan di DOS a evaluá e obra aki i a konkluí ku e obra ta apto pa presentá na e grupo di edat konserní i esei ta motibu ku aña pasa 6 skol a mira esaki i no tabatin ningun reklamo. Den e informashon nan ku ta riba retnan sosial tin hopi informashon ku no ta kuadra ku bèrdat i e personanan ku ta distribuí e informashon nan aki ta personanan ku no a mira e obra.

Finalmente ta informá ku Gobièrnu di Kòrsou no a subsidiá e obra aki. E aktividat aki a keda finansiá ku fondonan di otro organisashonnan internashonal.

Nos ta spera di a aklará e diskushon aki i nos ta sigui traha na desaroyo di nos alumnonan, di e forma korekto manera DOS a bin ta hasi esaki. Alabes ta informá ku DOS lo sigui duna informashon na públiko i mayornan i nos ta para habri pa kualke diskushon ophetivo riba e tema aki.