AMSTERDAM—Servisio di investigashon finansiero FIOD a tene entrada den 14 bibienda i negoshinan kaminda nan a konfiská 34 outo i 900.000 euro kesh.

Ta trata di un investigashon grandi Oropeo riba froude ku belasting. Segun Ministerio Públiko Oropeo organisashonnan kriminal internashonal a hasi froude ku benta di míles di outo na diferente manera. Asina un kompania aleman a kumpra outo di un dealer i a pidi e btw bek di gobiernu. E outonan tabata keda bende despues via komersiantenan na Hungaria i Italia ku btw. Pero enbes di paga e btw bek, nan tabata keda kune i disparse di radar. Ku fakturanan falsu e kumpradonan por a registrá e outonan den otro paisnan. Otro organisashonnan kriminal ku segun FIOD tin vinkulonan ku aktividatnan den Alemania, Hungaria i Italia, a komete froude ku belasting den Hulanda.

E kompanianan di outo tabata transformá outonan ku mester paga btw pa outonan ku a paga kaba ku fakturanan falsu. Servisionan di investigashon di 7 pais Oropeo, inkluso Alemania, Fransia i Portugal a tene 450 entrada den ultimo dianan kaminda a konfiská tambe edifisionan i outonan di luho. OM Oropeo ta sospecha ku organisashonnan kriminal ta evadi miones di euro den diferente pais Oropeo. Den Hulanda ta trata di minimo 6 mion euro segun kalkulashon di FIOD. Den e entradanan FIOD a detené 5 persona.