Chonki de Lannoy

Parera- Miembronan di Hunta di Komisario i Gerensha di Refineria di Kòrsou (RdK) a pone nan posishon na disposishon di Akshonista di RdK, esta Gobièrnu di Kòrsou. 

Hunta di Komisario i Gerensha di RdK a hasi esaki despues ku Akshonista di RdK, den un karta fechá djaweps 23 di Sèptèmber, a indiká ku Akshonista no tin konfiansa mas den Hunta di Komisario i Gerensha di RdK. 

Hunta di Komisario i Gerensha pa medio di un karta fechá djaluna 27 di Sèptèmber a reakshoná riba e ponenshanan inkorekto ku ta forma e base pa e motivashon di Akshonista pa kita su konfiansa den e Hunta di Komisario i Gerensha. Den e mesun karta a informá Akshonista tambe ku tantu e dos último miembronan di Hunta di Komisario komo Gerensha di RdK ta pone nan posishon na disposishon di Akshonista. 

E miembronan di Hunta di Komisario i Gerensha, konsiente di nan responsabilitat, a informá Akshonista di ta dispuesto pa keda den funshon bou di sierto kondishon, pa asina duna Akshonista espasio pa apuntá miembronan di Hunta di Komisario i Gerente na nan lugá.