Pik Pisas ku posibilidat serio tòg pa refineria.

Isla—Un kompania estado unidense, renombrá i konosí riba merkado petrolero venezolano, por bira un siguiente opshon pa gobièrnu di Pik Pisas sali for di e insertidumbre okashoná pa kompania ligá ku Caribbean Petroleum Refinery.

Global Oil ta un kompania di renombre ku ta ópera internashonal i na Estádos Unídos, pero ku den pasado a yega di firma un kontrakt kaba na 2019 ku PDVSA  via di nan kompania yu, Erepla. Erepla LLC tabata den kontrakt ku PDVSA unda nan a komprometé pa invertí 500 mion dòler estado unidens pa “upgrading” di diferente planta pa rafiná krudo na Venezuela. E grupo tin bastante aña ta trahando ku PDVSA den un relashon ku ta lanta i kibra bek, manera entre 2006 pa 2008 tabatin un disputa di 52 mion dòler riba spesifikashon di pago.

Na 2019 e kompanianan a bolbe purba un koperashon via di Erepla. Tabata e intenshon pa rebibá entre otro e planta na Tia Juana Lago i Rosa Mediano west di Maracaibo. E relashon entre PDVSA i e grupo a bira mas mihó despues intentonan di e.o. Chevron mes a bin keda si konkretisá.

Global ta konosí pa nan komersialisashon di asfalt via di nan kompania mama, Global Oil Management Group. Kontrali ku na CPR Erepla bou di maneho di Global na 2019 a apliká pa un lisensia di OFAC unda tabatin petishon pa un lisensia spesialisá. Mas aleu, akshonistanan di Global for di kambio di milenio tabata hasi negoshi ku PDVSA via un otro kompania Trigeant, ubika na Texas Estádos Unídos.

Den e siman tras di lomba, diferente rumor tabata sirkulando riba posibilidat di produkshon di asfalt. E grupo Global, a mustra hopi interes na inisiá un planta pa prosesá asfalt (no bahia di asfalt) sino invershon i upgrading di un sekshon riba Refineria Isla pa kuminsá produsí asfalt i eksportá esaki. Pa ekonomia di Kòrsou e posibilidat aki ta unu oportuno pa krea kupo di trabou pero tambe pa yuda mantené e reserva di divisas.