Algun parti di e pais tabatin un subida den kaso nan positivo di Coronavírùs.

SANTO DOMINGO – E gobièrnu di Repúblika Dominikana a emití e dekreto 345-21, den kua ta prolongá e estado di emergensia na henter su teritorio pa 45 dia mas. Esaki lo ta vigente kuminsando 30 di mei próksimo.

Segun e dekreto, e medida nan ta pa kombatí COVID-19 i salbaguardiá bida i salú di e poblashon. Ademas den e mesun siman aki a duna di konosé ku lo tin toke de keda na Distrito Nacional i e provinsia di Santo Domingo tur dia, entre 8or di anochi pa 5or di mainta. Esaki tambe komo parti di e medida nan pa para e propagashon di COVID-19.

Segun e komunikado di gobièrnu, e siudadano nan lo tin un grasia di sirkulashon liber di 3 ora adishonal pa yega nan kas nan. Abinader, presidente dominikano, resientemente a rekonosé ku tin un subida di kaso nan na Santo Domingo i e Distrito Nashonal, unda meskos ku na restu di e pais tin un toke de keda di 10or pa 5or di djaluna pa djabièrnè i di 9or pa 5or den fin di siman.