WILLEMSTAD – Djabièrnè, 8 di sèptèmber 2023, Funditut a otorgá sertifikado na 14 hóben ku a terminá e di dos fase di e proyekto ‘Un komienso nobo’. Ministerio di Defensa Hulandes ta responsabel pa e promé fase ku ta e Formashon Sosial (SVT).

Despues e hóben ta pasa pa e sigiente fase di e proyekto, kual ta e “Leerwerktraject” (LWT). Esaki ta bou di guía di e organisashon di ehekushon Funditut. Durante di e di dos fase akí, e hóben a haña guia pa asina siña un fishi ku ta pas ku nan kapasidatnan i alabes prepará nan mes pa subi merkado laboral. E sertifikado ta un prueba di perseveransha, disiplina i resilensia. Ku e dos fasenan aki Gobièrnu di Kòrsou huntu ku Ministerio di Defensa Hulandes ta brinda perspektiva pa futuro di nos hóbennan.

Inisio di koperashon
E proyekto akí ta ser ehekutá den kuadro di palabrashonnan entre Kòrsou i Hulanda pa lokual ta trata e reformanan den e asina yamá ‘Landspakket’. E reforma akí ta inkluí bou di e tema ‘H18’ i ta wòrdu konsiderá komo ‘Sociaal Vormingstraject’, pues Trayekto di Formashon Sosial. E ministerionan di Hustisia, Desaroyo Sosial Labor i Bienestar, Enseñansa Siensia Kultura i Deporte i Defensa Hulandes, tur ta partnernan den e proyekto akí.

Inskripshon grupo nobo
Na febrüari 2024, un grupo maskulino lo kuminsá ku e proyekto ‘Un komienso nobo’. Inskripshon a habri i den luna di desèmber 2023 lo bai tin e asina yamá ‘assessmentdagen’. Por inskribí via number di telefòn +599 9 563-6626, [email protected] òf via página di Facebook “Proyekto Un Komienso Nobo”