WILLEMSTAD – Debí na e outonomia di Kòrsou denter di Reino, Hulanda no tin konosementu propio, ni por, ni ta deseá di hasi un investigashon tokante e pagonan di impuesto di kompanianan di weganan di azar den e pais. Esei Minister di Relashonnan di Eksterior Wopke Hoekstra a splika Tweede Kamer riba preguntanan di dos miembro di frakshon VVD ku kasi semper tin bista riba Kòrsou.

Na promé lugá nan tabata ke sa di Hoekstra kuantu empresa di weganan di azar tin un pèrmit di Kòrsou, i kuantu kompania ku no ta menshoná den e artíkulo di ‘Follow the Money’ tambe ta riba e lista di sanshon di Ukraina. I si e no tin idea, si e ta dispuesto na investigá esaki. Hoekstra: “Tin 5 kompania ku pèrmit di gobièrnu di Kòrsou (masterlicenties). Gobièrnu di Kòrsou tin solamente informashon limitá tokante e kantidat di kompanianan ku tin suplisensia i ken ta doño di e kompanianan akí. E nòmbernan di e 5 titularnan ku pèrmit master no ta paresé riba e lista di sanshon di Ukraina. Den e periodo promé ku e lei nobo Landsverordening op de Kansspelen (LOK) drenta na vigor, Kòrsou ta tumando medidanan pa haña un mihó bista di esnan ku ta proveé weganan di azar den eksterior, bou di (sup)pèrmitnan di Kòrsou. Bou di e LOK, tur partido lo mester tin pèrmit propio, kreando asina un imágen mas kla.”

E Parlamentarionan hulandes a puntra Hoekstra ademas si e tin un idea di kuantu impuesto e kompanianan di weganan di azar ku tin sede na Kòrsou ta paga Kòrsou i si tin konstrukshonnan pa medio di kua por paga ménos impuesto di loke nan mester paga. I si e no sa esaki, si e ta dispuesto na investigá. Tambe nan a puntr’é si e ta mira oportunidatnan pa e ganashinan optené pa medio dje empresanan di weganan di azar na Kòrsou, benefisiá Kòrsou mas. “Debí na e outomonia di Kòrsou den Reino, Hulanda no tin konosementu propio, ni por, ni ta deseá investigá tokante pagonan di impuesto den e pais. E eskoho pa un sistema di impuesto i e entradanan fiskal deseá, ta dependé di Kòrsou. Pero ta generalmente konosí ku hopi empresa ta usa e sistema di teritorialidat, loke ta nifiká ku e preshon fiskal efektivo ta baha. Un dje metanan dje Pakete Nashonal pa e reforma di e sektor di wega di azar, ta oumentá e entradanan di gobièrnu, inkluyendo esun via derechonan di pèrmit.”

E Parlamentarionan a insistí riba e pregunta si Hulanda mes no tin idea di tuma sanshon, konforme e yamada di Ukraina na paisnan europeo pa nan tambe tuma medida. Hoekstra a añadí riba loke el a kontesta kaba: “Kòrsou ta investigando e empresanan menshoná. Si esaki no kondusí na siguiente pasonan miéntras ku esakinan ta na lugá pa tuma, e ora ei por konsiderá otro instrumentonan tambe, manera eksplorá e sanshonnan di Union Europeo.”

Segun e Parlamentarionan Spaña a pone 87 mion euro na but kaba riba kompanianan di weg’i plaka na Kòrsou, pasó nan no tabata kumpli ku regla. Pa e motibu ei nan tabata ke sa kon ta para ku introdukshon di un supervisor independiente pa weganan di azar digital na Kòrsou i kiko ta Kòrsou su punto di bista pa ku esaki. Segun Hoekstra Kòrsou ta fasilitá e sektor di weganan offshore tambe. Esaki ta enserá ku esnan ku tin un pèrmit di Kòrsou por ofresé weganan di azar digital rònt mundu, ekskluyendo Kòrsou mes.

“Sinembargo, vários ku ta proveé na Kòrsou tambe ta enfoká riba hurisdikshonnan kaminda ta rekerí un pèrmit, manera na Hulanda i Spaña. Si un kompania na Kòrsou ofresé sin un pèrmit lokal den un pais ku ta rekerí pèrmit, e ora ei e ofera ei ta ilegal na e pais ei. E hurisdikshonnan outorisá manera Hulanda i Spaña, mes ta supervisá i kontrolá e ofertanan ilegal den nan propio pais i por duna but konforme nan propio legislashon. Manera ya menshoná, e supervishon dje sektor di weganan ekstrateritorial (offshore) na Kòrsou di parti e supervisor aktual no ta adekuá. Komo parti dje reformanan den e Pakete Nashonal di Kòrsou, Kòrsou ta trahando riba un lei nobo (LOK). E lei nobo akí tambe ta establesé un supervisor independiente dje sektor, esta Curaçao Gaming Authority.” Segun Hoekstra Hulanda i Kòrsou tin kontakto regular tokante e reforma dje sektor manera palabrá den e pakete nashonal. Ta traha duru pa e reforma ta den efekto pa fin di e aña akí mes.