Ronny Cornelis ayera na rueda di prensa.

Parera—Funshonario den Tim di Mantenshon di Òrdu i Reglamento na MEO, Ronny Cornelis ayera durante un rueda di prensa a informá ku pa 2023 tin un interes grandi pa benta di kuminda i bebida kant’i ruta. Segun Cornelis, ya kaba a pasa hasi e kontròlnan nesesario pa despues ehekutá reglanan estrikto pa mantené tur kos na órden

Pa e periodo aki di Karnaval, Gobièrnu di Kòrsou a saka un kantidat di 123 pèrmit pa benta kant’i kaminda. 36 dje pèrmitnan ta emití pa “vèn” miéntras demas ta pèrmitnan pa “standplaats” di benta. Debí na un oumento di interes pa bende kos, MEO a alargá e periodo pa entrega pèrmit te ku 27 di yanüari último. Segun Cornelis, e pa por yega na un pèrmit pa e sektor Pariba, doñonan di pèrmit mester tin derechi riba un prekario tambe pa por pone nan establesimentu di benta.

Manera menshoná, e funshonario a splika ku durante Febrüari a kontrolá un kantidat di 115 establesimentu ku pèrmit pa bende. Esaki ta nifiká ku tur esnan kontrolá sa di e konsekuenshanan di no kumplimentu i MEO no tei basilá pa tuma e medidanan di mantenshon, kual entre otro ta konfiskashon di lokual por konfiská. Segun Cornelis, ta tuma sanshon mesora pasobra tur hende a keda alertá.