Península di Parguana i islanan ABC. Un área unda narkotrafikantenan ta akusando Marina Real Warda Kosta di ta aktuando ilegal den nan awanan.

Nieuwe Haven—Korte Penal den Promé Instansha, ayera a trata e kaso unda Ministerio Públiko a akusá 5 hòmber venezolano di a trafiká 580 kilo di mariwana.

Ta trata di e hòmbernan, Damni Gabriel Mata Salazar 1990 Venezuela, Jose Alexander Salazar Louis 1988 Venezuela, Fransisc Javier Solo Trillo, Juan Antonio Salazar Carrion 1959 Venezuela i Diogenes Ramon Lugo Arias 1958 Venezuela. Ta trata di un kaso di trafikashon ku tabata tratá riba 11 di Novèmber 2023. E tratamentu a keda posponé i ayera tratamentu a tuma lugá.

Tabata den oranan di mainta trempan riba 23 di Yüni 2023,  ku e tim di aresto tabata riba pia pa asina yega na e pir di Warda kosta pa yuda transportá i vigilá un kargamentu basta grandi di droga ku a wòrdu interseptá riba laman. Riba mesun dia den oranan di mardugá e barku di marina hulandes Zr. Ms. Groningen a logra interseptá un gofast karga ku bulto riba laman grandi. Mesora a logra di aborda e gofast i a konfiská e bultonan i tambe a hasi detenshon di sinku tripulante latino. Mesora a tripulante i tambe e bultonanku tabata kontené droga a ser transportá pa Kòrsou na unda e departamentu di DGC a keda enkargá ku e investigashon ku tin ku bai kontinuá. Huntu ku e tim di aresto a transportá e droga i tambe e sospechosonan pa warda na unda a pisa i tèst e droga pa despues kuminsá ku e trámitenan pa destruí esaki. Ayera a resultá durante tratamentu, e mariwana tabata destiná pa karga riba un otro boto.

E kaso aki ta trata di un kontinuashon unda durante promé tratamentu, abogado mr Eisden kende ta hiba defensa pa akusado Jose Salazar Louis i akusado Fransisco Sosa Trillo a pidi hues Carmelia si e por entregá mas petishon pa investigashon. Ta asina ku Eisden a splika ku el a nota ku outoridat a konfiská un telefòn di satélite i dos sistema di GPS. E abogado a pidi  e or’ei pa outoridatnan por fabor analisá e sistema di GPS pa wak si e sistema a registrá e área i e intersepshon a tuma lugá. Investigashon di warda kosta a determiná kue  intersepshon a tuma lugá den awanan internashonal, pero abogado Eisden a splika ku e no ta duda den e investigashon di warda kosta, pero e abogado a agregá ku demas investigashon lo ta faborabel.

Sinembargo, tantu abogado mr Themen – Cairo komo abogado Dickens a para tras di e petishon pa investigashon adishonal ku abogado mr Eisden a trese dilanti.  Fiskal mr Hara a indiká ku no mester di duda ku e intersepshon dje droga a tuma lugá den awa internashonal. E fiskal a agregá e por traha un prosès ferbal adishonal di e sistemanan di GPS pa agregá dikon e sistemanan no mester wòrdu investigá. E venezolanonan a arguementa ayera ku nan tabata den awanan internashonal. Durante tratamentu dje kaso, akusado Salazar Louis a indiká  ku su persona i tur ko-akusado ta piskadó pues nan tin un bon indikashon tokante ki ora ta awa teritorial di Venezuela i ki ora ta awa internashonal. E akusado a agregá ku durante intersepshon e ta sigur ku nan boto tabata den awa teritorial di Venezuela.  “Na momentu ku nos a keda interseptá nos por a wak lus for di Venezuela, pues esaki ta sufisiente indikashon ku nos no tabata den awanan internashonal”, e akusado a indiká na hues.

Hues Carmelia kende a tende ámbos banda  a indiká ku den un prosès ferbal publiká riba 6 di novèmber outoridat a indiká ku tin algun material konfiská kual ta inkluí dos sistema di GPS di marka Garmin i algun telefòn. E prosès ferbal ta sigui splika ku a opta pa no investigá e data riba e sistemanan di GPS, pero e hues a remarká mesora ku e prosès ferbal no ta duna un rason pakiko un investigashon mas profundo no a ser ehekutá. Basá riba e informashon aki, hues Carmelia a pidi OM pa traha un prosès ferbal di nobo splikando dikon no por investigá e GPS ma profundo i si akaso por investigá e GPS pa por fabor hasi esaki di nobo.

Ayera e hues a splika ku tabatin un sondeo riba e GPS nan kual no por a konklui ku e venezolanonan no tabata den awanan internashonal. Warda Kosta a enfatisá ku nan tabata den awanan internashonal.  E abogadonan defensor no tabata por a stipulá den kua laman e kordinatonan ku e sondeo riba GPS tabata duna. Esei a pone ku no tabata posibel pa hiba un bon defensa. E investigashon di GPS ta importante pa averiguá di e venezolanonan tabata den laman venezolano. Tur tres abogado defensor di e venezolanonan a protesta ayera pa kontinuá tratamentu pasobra e informashon riba e sondeo di GPS a yega korte lat, un hecho ku fiskal di Ministerio Públiko mr. Hara a atmití.

Hues mr. Carmelia a posponé tratamentu di e kaso pa defensa di e venezolanonan tin mas tantu tempu pa studia e sondeonan riba GPS. E kaso ta sigui riba despues di Febrüari.