Juni Aniceta: despues di organisá karnaval no ta keda nada mas riba kuenta di banko.

Veeris—Djaweps último, durante un rueda di prensa organisá pa Fundashon Desaroyo Karnaval Kòrsou, Juni Aniceta kende su organisashon a yega di organisá karnaval, a konfirmá ku e presupuesto ta unu limitá.

“No ta keda kasi nada mas despues di karnaval”, e la duna di konosé durante e rònt di pregunta. Segun e promotor, e presupuesto ta limitá i durante nan enkargo nan tabata trata na tene e kostonan di organisashon abou, pero esei ta un tarea kasi imposibel e la splika. Minister di Kultura, Sithree van Heydoorn a splika ku e proseso di supsidio pa karnaval ta unu preskribí ku ya e aña aki ta tras di lomba. E minister tin deseo di organisá un grupo di tarea pa por kalkulá e kostonan envolví pa organisá karnaval i asina trata na wak efektividat di e supsidio i tambe si akaso mester oumentá e suma.

Pero en realidat, e kosto pa organisá karnaval ta hopi mas haltu ku 1.5 mion florin manera presentá pa fundashon FDKK. Si realmente mester kalkulá kosto èkstra di tareanan kual ta kai dirèkt bou di gobièrnu i kompanianan anónimo estatal, tin un oumento mas ku dòbel di 1.5 mion florin. Den e kaso aki mester kalkulá kostonan di overtaim di polis, brantwer, Selikor i hasta “dranghek” por ehèmpel ta oumentá e totalidat. Ta kalkulá ku e “impakto ekonómiko” di karnaval den ekonomia ta alrededor di 8 mion florin.

Défisit: “Manchi a lansa gritu ayera pa sektor privá yuda”.