WILLEMSTAD – Parlamentario Sheldry Osepa di frakshon PNP no ta forma parti mas dje komishon di Derechos Humanos, Justicia y Polítcas Carcelarias. Gwendell Mercelina, ku ya kaba ta miembro di Komishon Fiho di Hustisia, ta remplas’é. Asina Parlamento a disidí ayera, riba proposishon di Osepa.

Komishon Sentral a reuní kòrtiku tokante e tema akí. Riba pregunta di Parlamentario Giselle Mc William di MAN, Presidente di Parlamento Charetti America-Francisca a splika ku Osepa di PNP ainda ta forma parti di mas komishon di Parlatino. I riba petishon di Ana Maria Pauletta, sostené pa Zita Jesus-Leito (ámbos di PAR), Parlamento lo risibí un lista ku tur e nòmbernan di Parlamentarionan den e respektivo komishonnan di Parlatino. Pauletta a rekordá ku Michelangelo Martines di KEM a bandoná reunionnan di Parlatino i Fergino Brownbill di MFK tambe a sali for di un komishon. P’esei ta importante pa Parlamento tin e lista aktual. Presidente America-Francisca a primintí di lo pone esaki disponibel riba e programa digital di Parlamento kaminda por haña tur dokumento. America-Francisca a aklará pa si tabatin pregunta òf duda tokante su ròl den Parlatino, ku e no ta e persona ku ta hinka ni saka niun hende for di komishonnan di Parlatino. Parlamentarionan Osepa òf presidente Amerigo Thodé lo por splika mas di esei despues.