Punda—Ekonomia di Kòrsou lo sigui importá inflashon for di paisnan fo’i unda nos  ta importá. Segun sifranan di Banko Sentral tantu Estádos Unídos komo Hulanda lo konosé oumento den inflashon. Miéntras Kòrsou sigui importá for di e paisnan menshoná, e inflashon na Kòrsou tambe ta sigui haltu durante 2022.

Tin dos faktor importante ku ta bai afektá preis di konsumo na Kòrsou. E inflashon riba merkado estado unidense i hulandes ya ta pone ku Kòrsou ta importando na preisnan haltu for di ámbos merkado, pero tambe e efektonan logístiko den ámbos pais, unda prinsipalmente transporte i labor ta birando mas karu.

Aparte di ta importá inflashon for di ámbos pais menshoná, e desaroyo di inflashon riba merkado lokal tambe ta di influensha, debí na un korelashon dirèkt ku produktonan i importá na preisnan mas haltu. Na Kòrsou despues di a konosé un bahada na finalnan di 2018 pa inisio di 2019 manteniendo inflashon bou di 1%, 2020 pa 2021 a konosé un oumento drástiko di inflashon yegando kasi 3% na finalnan di 2021 miéntras tin indikashon ku durante 2022 esaki a mantené su mes.

Pa produktonan den makutu básiko  i awor ku gobièrnu kier introdusí ampliashon di e makutu, esaki no ta un bon notisia pa importadónan.  Tantu na St. Maarten komo na Kòrsou, preis di konsumo a aselerá debí na e problema logístiko den e kadena di provedornan internashonal.  Mas aleu oumento den preis di krudo tambe a sostené un oumento den preisnan di konsumo. Kòrsou ku for di 2018 ta importando kombustibel ta kuminsá sinti multi efekto riba su oumento di preisnan kolektivo pa produktonan di konsumo.

Na Kòrsou, inflashon a subi di 2.2% na 2020 i yega te na 3.8% na 2021. E oumento ta den mesun liña komparabel riba merkado di konsumo na Estádos Unídos. Pa 2022, pronóstikonan ta mustra posibilidat di un inflashon entre 4 pa 6%. E desishon pa amplia e makutu básiko, durante un periodo ku nos ta importando  inflashon i konsekuentemente oumento di inflashon riba merkado di konsumo lokal, ta kòrta dirèkt riba márgen di ganashi for di kompanianan importadó.

Di otro banda, gobièrnu tampoko no tin muchu opshon. Sin amplia e makutu básiko, konsumo kolektivo ta bira mas kostoso pasobra produktonan pafó di e makutu ta bira mas karu. Kolektivamente Kòrsou ta bira mas karu, miéntras e poder di kompra no ta keda adaptá. E ekonomia konsekuentemente ta drenta den un klèm. Di un banda importadónan no tin niun opshon di sigui subi preis kombiná ku oumento den kosto di kombustibel miéntras di otro banda bolsa salarial kolektivo tampoko no ta keda adaptá na inflashon.

Tantu gobièrnu komo importadónan ta bringando un guera difísil pa gana. Por ehèmpel na final di 2022 preis di gasoil tabata 30% mas karu kompará na Desèmber 2021. Pa transportá produktonan di magazein pa supermerkado a bira mas kostoso. E índise den preis di konsumo a oumentá kombiná ku inflashon haltu. Konsumidónan ta bira mas selektivo riba habitonan i den nan gastamentu.