Sin outo: Tim di Atrako ta sin vehíkulo. Si en bèrdat Hulanda i Kòrsou tabatin bon intenshon ku e Lei di Konsenso Polis, lo no tabatin skarsedat den Kuerpo di Polis.

Rio Canario—No tin ningun organisashon na Kòrsou ku a sinti efektonan negativo di e Leinan di Konsenso, sino ta Kuerpo di Polis. Lei di Konsenso Polis, “Rijkswet van 7 juli 2010 houdende regeling van de inrichting, de organisatie, het gezag en het beheer van de politie van Curacao, van Sint Maarten en van Bonaire, Sint Eustatius en Saba en de onderlinge samenwerking tussen de politie van Curacao, van Sint Maarten en van Bonaire, Sint Eustatius en Saba (Rijkswet Politie van Curacao, van Sint Maarten en van Bonaire, Sint Eustatius en Saba) “, nunka a funshoná konforme kontenido, diseño, struktura i meta di e lei.

Durante último siman, por a sigui den Vigilante kon entre otro Kuerpo di Polis tin solamente un trahadó sosial pa atendé mas ku 700 polis. Un mishon imposibel pa kumpli. Tambe, último siman a sali na kla ku Kuerpo di Polis no tin ni un vèn pa transportá prezu di prizon pa hiba korte. Prezunan mester kore den SUV ku bus di tour pa bai korte. Sindikatonan di polis, i no gobièrnu, mester a bula bai Aruba pa fia dos vèn bieu trese Kòrsou, kual nan no ta den operashon ainda for di òktober 2021. I finalmente, reshèrshi no tin vehíkulo pa kore hasi nan trabou. Esaki ta djis algun ehèmpel, kon e Lei di Polis ta un lei nechi riba papel, pero ku Hulanda i Mandatarionan huntu ku nan konseheronan nunka a prekupá ku ehekushon di e Leinan di Konsenso.

Si wak e Lei di Konsenso di Polis na su kontenido, e no tabata un lei práktiko ni tampoko ehekutabel. Hopi artíkulo den lei a wòrdu skibi pa huristanan sin konosementu di organisashon i struktura di polis. Mas aleu, durante dos proseso di evaluashon, konseheronan di Kòrsou tambe a frakasá dor di opta pa partisipá ku Hulanda pa prolongá e leinan. Mas ku 40% den lei di Konsenso Polisial, no a yega na ehekushon miéntras demas 60% a keda mal ehekutá sin a kontrolá efektividat i efisiensia.

Artíkulo 20-35: Gemeenschappelijke Voorziening Politie
No tin un ehèmpel mas klásiko pa proba dikon Lei di Konsenso Polis no ta funshonando. Un kantidat di 16 artíkulo repartí den 36 insiso ku no ta operashonal. Gemeenschappelijke Voorziening Politie (GVP), mester a bira un funshon di staf den Kuerpo di Polis. De fakto, e funshon mas importante den hinter kuerpo di polis. Den e lei di polis e parti di GVP ta asina amplio e ta wòrdu repartí den 2 paragraf. GVP, mester a bira e funshon den kuerpo di polis ku tei atendé, kordiná i solushoná tur problema ku ta regardá alokashon di medionan den e kuerpo. Esta alokashon di medionan humano, medionan finansiero i medionan material. Nos ta papiando di 1) alokashon di polis riba sierto puestonan, 2) alokashon di invershon i maneho di likides di e kuerpo i finalmente 3) alokashon di tur kos ku ta trata material, material di ofisina, vehíkulo, arma etc. Pues e faktor di produkshon di material. Te awe, na mart ainda no tin e GVP. GVP NO ta eksistí, i ta lógiko ku e Kuerpo di Polis ta sin kordinashon. E lei a preskribí un posishon di kòntròl, sin nunka gobièrnu di Kòrsou a implement’e.

Konseheronan Yu di Kòrsou, kende na e momentunan aki ta bolbe bini dilanti durante presentashonnan di COHO, na dado momento a tuma e desishon pa konsehá pa laga RST, tuma enkargo di e funshon di GVP. E pensamentu so di duna RST e funshon di GVP, ta mustra klaramentu ku ni Kòrsou i tampoko Hulanda no tabatin tempu pa e Lei di Konsenso Polis. Miéntras RST ta ubika den un kompleho di ofisina resien remodela na Zeelandia, reshèrshinan yu di Kòrsou ta sinta tur dia den un kompleho no adekuá ku hasta por a hòrta 600 kilo di kokaina. RST, riba kada investigashon grandi ta hür outo. Te ku e siman aki, Tim di Atrako na Garipitoweg no tabatin ni 1 outo pa kore aden. RST, na momento nan no ke interogá un sospechoso den nan kompleho di ofisina bunita na Zeelandia, ta drenta Garipitoweg i hasi interogashon miéntras reshèrshinan na Garipitoweg no por uza ofisina di RST na Zeelandia. E Lei di Konsenso Polis a krea un deskriminashon den Kuerpo di Polis, lagando Rio Canario i Garipoitoweg deskuidá i dunando luho i fasilidat na Zeelandia. Tur minister di hustisia, do 2010 te ku 2022 a partisipá na e deterorio. Rio Canario i Garipitoweg a pasa den dos evaluashon riba e Lei di Konsenso Polis, 2014-2018. Na ámbos okashon konseheronan di Kòrsou a bai di akuerdo pa prolongá e lei. GVP te na 2022 no a mira lus di dia.