Aparentemente ámbos bùs tabata move ku un spit hopi haltu.

LIMA – Mas di 20 persona a resultá heridá den oranan di ayera na rais di un choke entre dos bùs di transporte públiko na e distrito di Los Olivoa, na nort di Lima. Ta trata aki di bùsnan ku tabatin míles na multa di infrakshonnan na reglanan di tráfiko.

E aksidente a keda produsí den oranan trempan di mainta, na altura di e kilometer 20 di e karetera Panamerikano Norte, entre sos bùs di e empresa Señor de la Soledad i e El Chino. Esaki a laga saldo di mas ku 20 pasahero heridá, 11 di nan di gravedat.

Esun nan ku a resultá levemente heridá a keda atendé na e sitio, pa e personal di Sistema di Atenshon Mobil di Urgensia.

Ya a kuminsá ku e investigashonnan pa asina por establesé e responsabilidatnan den e kaso i tambe imponé sanshonnan korespondiente.

No opstante, a señalá ku e vehíkulo di e empresa Señor de la Soledad, tin outorisashon, Seguro Obligatorio di Aksidente di Tráfiko i Kòntròl Tékniko vigente, pero tin kasi 4 mil dòler na multa.

Di su banda, e otro bùs aksidentá, ta konta ku un outorisashon na nòmber di e empresa Edilberto Ramos SAC, ademas di SOAT i inspekshon tékniko vigente, pero tambe tin multanan na balor di mas ku mil dòler.

Segun informashonnan preliminar di testigu nan di e suseso, ámbos bùs an tabata sirkulá ku un velosidat eksesivo i a aksidentá na momentu ku a trata di ingresá na e mesun parada.